miércoles, 20 de diciembre de 2017

Un 20 d'aviento mas

Lo 20 d'aviento habría de servir-nos a todas pa reflexionar bella mica sobre l'estau d'Aragón y de l'aragonesismo entendiu amplament. Fa mas de quatro sieglos, Aragón se devantó contra una inchusticia y por la suya soberanía. Hue, bell repui d'aquello luitamos por que contine vivo ixe sentimiento de dignidat que, igual como l'auron u l'aragonés, nunca no ha desapareixiu de tot, pero ye en las tres pedretas, bien amanau a estar una remeranza nostalchica.

Politicament nos trobamos popiellos d'una gran fuerza politica que arrocle l'aragonesismo y, lo que ye pior, que pueda ficar en los debatz publicos la necesidat evident de que Aragón siga sucheto politico soberano, u simplament, fer charrar d'os problemas mas cercanos y urchents d'a tierra nuestra. Las que ne b'ha agora mesmo, u no acaban de plegar en toda la chent que nos cal, u han rebaixau lo discurso dica esdevenir inutils pa qualsiquier cambio real. 

L'espanyolismo ha arramplau, sobre tot en lo zaguer tercio de l'anyo, con qualsiquier problematica propia. Los nuestros debatz y circunstancias los han pasaus a un segundo plano politico y informativo, en favor d'una campanya propagandistica en contra de l'independentismo catalán y d'o dreito a decidir d'ixe pueblo, y por extensión, de totz los pueblos sin estau.  Mesmo parte de l'aragonesismo, s'ha posicionau con l'espanyolismo, u en posicions de falsa neutralidat cuanto a iste tema, perdendo qualsiquier lechitimidat a la hora d'una futura reivindicación soberanista.

La mesma celebración d'ista efemeride d'o 20 d'aviento no s'ha puesto fer, atro anyo, de manera unitaria. Lochico, en viyer las diferencias que nos separan y la suya profundidat. Soi lo primero que, con seguntes qui, ni pa fer una biera. Y ye que caldría tener claro quals son las reivindicacions que consideramos medulars en lo movimiento aragonesistas. Si nos qüestionamos mesmo la posición cuanto a reivindicacions historicas como la oficialidat d'as nuestras luengas, u lo reconoiximiento d'o dreito a decidir d'os pueblos, l'aragonesismo no sirve pa cosa.

Pero como bien remera de cabo quan Txemaurri, lo redotismo se castiga con gulag, asinas que quiero dar ixa chisla d'asperanza, u optimismo, u como le queratz decir. La mia cheneración politica creixió en un momento muit dulz pa l'aragonesismo. La menaza d'o trasvase fació que, de rapiconté, apareixese aragonesistas como fongos. De vez, l'aragonesismo mas oficial rebaixaba a moniquet lo suyo discurso entre que nusatras afundabanos por cada diya en lo soberanismo como parte d'a solución a los problemas nuestros. Lo resultau, una perdua de bases y votos y, lo que ye pior, una perdua de referent politico institucional soberanista.

La cheneración d'as mas chovens d'agora, han habiu de construyir lo suyo discurso en un ambient muito mas dificil. Manimenos han sabiu fer-lo, en la mia opinión, d'una manera muit efectiva. No soi d'alcuerdo con tot, como no en soi con dengún, pero en linias chenerals, tienen un discurso claro, contundent y que esviella bell vicio que tenebanos. Y sobre tot, no s'esbafa los mensaches en busca d'arroclar sectors que poco u mica tienen a viyer ideyolochicament con lo soberanismo.

Viyer tantisma chent choven en actos u manifestacions como la d'o pasau 16 #PerLaLibertat, u en la charrada "La clase obrera y el derecho de autodeterminación" de fa un mes, ye un buen sinyal de que, mesmo en los piors momentos, lo soberanismo puet movilizar-se y tien futuro.  Estió tamién, una oportunidat en un momento dificil, de trobar-nos abrigaus con ixa calor que da las companyeras de luita, y que te fan querer continar luitando.

Ni yo ni muitas atras, ya no valemos pa prebar de reteixer relacions con todas las que femos parte de l'aragonesismo. Tiengo la mochila masiau cargada d'historias y historietas. Pero confio en la responsabilidat y capacidat d'istas chovens cheneracions pa fer-lo. A la fin, todas nos consideramos herederas politicas y historicas d'aquells que se devantoron contra la monarquia hispanica fa mas de quatro sieglos y somos en la mesma luita de fundo: desfender los nuestros dreitos y desobedeixer debant d'as inchusticias. Que iste siga lo zaguer 20 d'aviento que siga un 20 d'aviento mas.

martes, 5 de diciembre de 2017

Grudas, chopos capeceros y la despoblación. Tierra de barrenaus 4x03

Tierra de barrenaus se torna mas rural que no nunca en iste programa que fa lo tercer d'a temporada. Mas de dos horas dando mal en aragonés, como siempre, con convidadas de luxo, y con tres seccions bien intresants.
 
Empecipiamos con Arale, que torna t'o programa ta charrar d'atro animal menos polemico que lo lupo: la gruda. Istas aus tant sinyaleras son visitando lo nuestro país en istas calendatas, asinas que ye un momento sobrebueno ta conoixer-las bella mica mas y apreciar-las como cal.

En lo segundo bloque, quatro companyers nos comentan la suya experiencia en la Fiesta d'o chopo capecero celebrada en Allepuz y Exorcas en setiembre d'estianyo. Una chornada que une muitas disciplinas: naturaleza, oficios tradicionals, cultura popular, ... y, como no, con firme borina y lifara.

Ta rematar engueremos sección: la podrufierta. Con ixe nombre amprau d'a mitica Ziberrufierta, quiero que i cullan debatz sobre la realidat social, politica y cultural aragonesa. En ista primer edición lo tema esleixiu estió la despoblación, un d'os grans problemas d'o país, que estió analisau por quatre companyeras. Si queretz proposar bell tema ta siguients programas, u dar la vuestra alportación a las opinions d'a companyeras, podetz deixar-lo como comentario contino, u contactar-me por los retes.


Y como siempre, bella chorradeta mas, la millor mosica d'aqui y de dillá d'as mugas nuestras, y muitas ganas de fer mas facil vivir en aragonés

lunes, 4 de diciembre de 2017

Especial D'estrela a estrela 2017. Tierra de barrenaus radio: Azetil Zisteina

D'estrela a estrela siempre ye una ocasión especial. Ya son siet las edicions que leva ista iniciativa emplindo las ondas de Radio Topo d'a nuestra luenga. Durant mas d'un diya, ista emisora libre, emite programas especials d'a suya programación feitos de raso en aragonés y/u catalán.



Prou que Tierra de barrenaus no podeba faltar-ie. En las dos zaguers edicions, facié un programa especial sobre los Pilars, que acababan de rematar, ya que se gosaba de fer ta noviembre (especial 2015, especial 2016). Manimenos iste anyo opté por experimentar un poquet con bella ideya que teneba dondiando por lo tozuel dende feba tiempo. Asinas que, quasi sin guión, nos chuntemos ta fer lo canelo un ratet.

La primer sección estió Patos por Independencia, an que charremos d'os titulars mas absurdos d'ixe panfleto clamau Heraldo de Aragón. Cada semana daría ta emplir tres u quatre programas. Si queretz saber lo por qué d'o nombre tos caldrá ascuitar lo programa.

Continemos con "Buenya u de cuenya", unatra sección an que debatibanos si las obras de ficción que hebanos trigau yeran buenya, u yeran "de cuenya". Sí, "de cuenya" ye invento. Pero que queretz? Que faiga servir "D'abuti"? Pues ixo. Ista sección la heba anunciada bell diya antes con una videofatera, an que antimás ilustraba l'angunia de dos guionistas que no adubidan con la suya faina.



Ta rematar, lo faciemos con "Quiesta tronca", una sección an que charremos d'os catalogos de chuguetes, en ista entranyables calendatas.

Tot, prou que sí, con buena humor, fendo risas y asperando transmitir tot lo buen ambient que bi habió en l'estudio. Un programa caotico como pocos, pero que tos fará pasar un buen rato.

miércoles, 29 de noviembre de 2017

Lo follet Manel

Feba rato que buscaba a lo suyo follet. Manel levaba bell tiempo despareixiu. Ni rastro bi’n heba en la mochila, an que gosaba d’acubillar-se entre que Eva lo levaba t’a clase.

Lo heba buscau en la caixa d’o Scrabble, porque a Manel l’encantaban los chuegos de parolas. Una vegada, heba desenreligau todas las a’s d’a parola “shawarma” y, limpio estirar-las, las heba transformadas en las escaleras, d’un chuego de “escaleras y esbarizaculos”. Con la suya “w”, y atras dos que ampró de “windows”, fació las guirnaldas que rodiaban lo tauler de chuego. En la “o” dibuxó los numeros d’un dado redondo, que siempre marcaba un siet. Y pa numerar las caixetas d’o chuego, estió toda una nueit cazando los emojis que esvolastriaban de nueitz en los cielos zaragozanos, viachando de mobil ta mobil.

Lo buscó tamién en una lata de Pringles okupada, an que chestionaba un centro social con bell churi d’o barrio y las paixarelas viacheras, que compartiban, en pasar por la ciudat, los suyos conoiximientos adquirius en tierras d’Africa. Le preguntó a lo limaco Chuan, que gosaba de dormir-ie. Quan Chuan leyeba se concentraba a-saber-lo y se podeba viyer las imachens d’o libro salir d’as suyas antenetas. Una Moby Dick flotaba sobre ell, entre que Eva le daba ferrete

- Chuan, Chuaaaaan, Chuaaaaaaaaaaaaaaaaan !!!!

Le caleba triplicar lo numero de vocals cada vez que le chilaba, si quereba que le fese caso. Tot lo mundo sabe que ixe ye lo truco pa fer que un limaco concentrau en la lectura te faiga caso. Pero tampoco no sabeba a on pegaba Manel.

Rechiró, prou que sí, en lo calaixo d’os peducos y, ¡como no!, se lo trobó pleno de perrecallos. Los repuis d’os tallers de costura que feba lo follet. Manel teneba lo costumbre d’instalar-ie una maquina de coser que l’heba amprau a la monyaca Nancy, y se feba, y se refeba, y se recontrafeba ropa de moda folleta, que ye la mas aclamada en toda la carrera. Los folletz chitans, y los marroquis, y los rumanos y los chinos, y d’orichens y culturas mas aluenyadas como los folletz chupiterianos, s’amuntonaban en lo mercau que Manel montaba lo zaguer viernes de cada mes. Astí amostraba las suyas obras, feitas a pur d’esmicazar-le los peducos a la pobra Eva, que bella vegada no adubiba a mercar-ne mas. S’intercambiaban las ropas entre folletz, y conseguiban combinacions que eslucernaban a los muixons que los sobrevolaban. Y chirando chirando, baixaban y las contimparaban con las suyas colors. Sobre tot los mastos, que en tienen mas, y aprofitaban pa presumir-ne. “Porque somos muixons y ropa no nos ne cal, que sino, te lo mercabanos”. De cabo ta quan, mesmo le deixaban bella pluma d’a color mas polida que tenesen, a truca d’o buen rato que les heba feito pasar alufrando ixos repolius vestuaches.

Le preguntó a la peluquera que le feba las rastas. Yera aqueferada, porque los suyos fillos no febar que chugarriar entre las suyas deciseis garras, y no le deixaban fer la ficancia que caldría quan yes tallando los pels a quatre fadas, y pentinando a una minirabosa bambosa que s’aprestaba pa una voda. Entre tallo y tallo, Katrina la doblearanya, le recontó que Manel  no heba iu dende feba bella semana, y que le heba pareixiu raro. Porque Manel, atra cosa no, pero las rastas las teneba siempre bien cudiadas. Les adedicaba firme rato, pa tener-las escoscadicas como cal. Se las adornaba con simbolos de luitas. D’as perdidas, las ganadas y las que quedaban por luitar. La zaguera que se metió, le dició la doblearanya a Eva, estió la d’a campanya que heban empecipiau los coscurros por la suya dignificación. “Ni lo nombre les respetan en zagueras” - deciba que le explicaba Manel entre que Katrina le pasaba lo champu.

“Por aquí no ha pasau hue”, le respondioron los suyos companyers d’a colla de mosica. “Y no ye aqui ni la donzaina, ni lo theremin suyo, asinas que be de tener-los ell”. Lo local d’ensayo yera la caixeta d’una casete de Kortatu. La heban apanyada firme y heban montau un chiquet scenario, pa si bell diya quereban fer-ie conciertos. Un equipo de mosica, feito con los components d’una radio viella, furniba toda la potencia que les feba falta t’as suyas borinas d’as nueitz d’os lunes. Lo heba montau Trunel, un follet que, de estar-se tot lo diya sentau sobre un condensador, heba esdeveniu cibernetico a pur de faradios. Garra d’ells no heba visto a Manel, pero tampoco no pareixeba que les preocupase guaire. “Por lo ríu andará” - deciban entre que escobaban lo local - “volando con bell rodiabalsas, u bufando gaitas”.”¡Que despreocupaus istos mosicos!” - se pensaba Eva siempre.

Eva, caricacha y cansa, empecipiaba a fer-se-ne. ¿A on pegaría Manel? ¿A on sería ixe chugarrín follet que tant buenos ratos compartiba con ella?

Le demandó a Mistoriacoides, lo gato que compartiba la casa suya, que l’amprase un d’os suyos bigotes. De l’almario de Manel, esleixió una d’as suyas capas antiplevia, feitas con embolicallos d’os carambels que le trayeba mai de cabo ta quan. Y con un agarrapizador de luces, estrena de Manel pa la suya fiesta de “prima primavera”, furtó toda la luz roya d’os standby de l’edificio suyo. Ixa yera “la millor manera de fer un reclamo pa folletz”, le heba explicau una vegada. “Si quiers que belun de nusatros vienga a toda vitesa a estar-se con tu bell rato, nomas has de fer servir ixo. Bueno, y un poquet de queso azul, tamién faría honra”. Eva se feba la riseta remerando como Manel imitaba a un churiguet radendo lo queso mientras lo deciba.

S’acofló chunto a la finestra, con lo reclamo de folletz en la suya forcacha. S’ubrió un libro y un hordio, y empecipió a leyer, segura de que Manel i apareixería antes con antes.

domingo, 26 de noviembre de 2017

Un futuro grafico pa l'aragones?

Ya ha pasau nueu meses dende que se presentase en la Biblioteca d'Aragón de Zaragoza un documento clamau "Una grafía común para el aragonés y sus variedades". La historia de como se plegó en ixe documento ye larga y tenetz documentación arrienda, pero cal recordar que se prenió como partes d'o "conflicto", con buen criterio en la mia opinión, a las tres asociacions con propuesta grafica propia. Ye decir, Consello d'a Fabla Aragonesa (CFA), Estudio de Filología Aragonesa (EFA) y Sociedad de Lingüística Aragonesa (SLA).

Lo debantdito documento pretendeba estar una grafía de consenso que fese toda la comunidat de fablants d'ista polida y maltractada luenga. Poco tiempo dimpués d'a suya presentación, tanto EFA como SLA anuncioron que no la farían servir. Por lo que sé, CFA tamién ha decidiu no fer-la servir como organización. De las grans asociacions adedicadas en exclusiva a l'aragonés, nomas Fablans, s'ha amostrau a favor d'ixa grafia. D'a chent que gosabanos (y gosamos) d'escribir en aragonés, una parte muit chiqueta la ha presa como propia. Lo mesmo Director Cheneral, "quitaba fierro" a la prebatina de grafía, aclarindo, en siede parlamentaria, que se tractaba nomas d'un "informe d'unos expertos". Asinas que ixe fullo y meyo publicau en lo BOA, con la suya corrección posterior, a la fin ni ye grafía, ni ye de consenso.

Ye una graniza pena que s'haiga deixau pasar unatra oportunidat de plegar en un alcuerdo grafico. Ye una d'as cosas mas urchents en la normalización d'a nuestra luenga. Pero pareixe que habremos d'asperar bell anyo mas. Tot lo que ha pasau en iste tiempo, creigo que mereixe bella reflexión.

La primera ye que cal aprender d'as errors. La ideya de prener a tres expertos independients pa que decidisen sobre l'afer grafico, a priori, yera buena. Lo desarrollo no pas tanto. Ye evident que no bi ha habiu comunicación, u a lo menos no prou, con las organizacions. Por lo que sabemos, ni entre lo expertos. La ideya d'a mediación externa yera innovadera y con gran potencial, pero pa mediar cal que i sigan presents las partes.

Tenemos atros temas rusients con envistas muit diferents entre las sensibilidatz presents en lo mundo de l'aragonés: autoridat lingüistica, marco europeu, ... La oportunidat de resolver lo conflicto grafico en ista lechislatura ya ha pasau, pero encara somos a tiempo de trobar solucions pa la resta. Si se torna a prener solucions sin contar con todas las sensibilidatz, tornaremos a trobar-nos con unatro fracaso. Qualsiquier mida que se prenga asinas tendrá de durada lo que la lechislatura, u nian ixo. Una autoridat lingüistica no reconoixida, tendrá la mesma utilidat que una grafia que no fa servir dengún. Se podrá vender como logro politico, y prou que tendrá la suya clica d'aplaudidors, pero honra, no le'n fará a l'aragonés.

D'a derogación d'a lei de no-luengas d'o LAPAPYP, ya no en charro mas. Una pena que, tot y tenendo mayoría parlamentaria los partius que levaban en lo programa fer-ne una nueva (PSOE, Podemos, CHA y IU), y fendo ixa reforma parte d'o programa de gubierno PSOE - CHA (punto 22), haigan decidiu continar con la discriminación lingüistica en iste país nuestro. Habrán d'explicar quan y por qué decidioron no cumplir con ixe punto d'o programa.

L'atra reflexión que cal fer, ye arredol de trobar una solución a lo conflicto grafico, que contina pendient. Si pa bella cosa ha serviu iste proceso empentau por la DGPL ye pa fixar bella posición y pa que la chent se significase publicament. ¿Queda espacio pa una futura negociación? Amplos sectors de EFA y SLA han amostrau que entre las dos grafías se puet trobar puents. Pero, ¿qué espacio ha deixau CFA? La grafía DGPL, como lo propio president de CFA reconoixió, ye basicament, la d'o 87 con v. (5) Manimenos, ixa organización no la ha presa como propia y contina fendo servir la d'o 87, ya quasi en solitario. Alavez, ¿en qué exactament yera disposau a reblar? U 87 u cosa? Qué ye negociable graficament pa CFA? No son preguntas retoricas, que conste.

Me niego a reblar y creyer que no bi ha solución, u que a sola solución ye la obediencia ciega y acritica a unas politicas que muitas entendemos que no resuelven, u mesmo agravan los problemas que ya tien a luenga. Somos a tiempo de aturar, reflexionar y empecipiar a trobar solucions de verdat, acceptadas por todas, u lo menos por una ampla mayoría. U, en iste tema, habremos perdiu unatra lechislatura.

jueves, 23 de noviembre de 2017

En leyendo... Lo suenio d'o Fevre

Si las chefas son odiosas, y las chefas inutils en son mas, bi ha encara un ser mas despreciable: la encargada. Ixa persona que no ye la duenya d'a interpresa, pero que aspira a estar-ne. U pior, que creye que en ye. Que te tracta como si fueses purria, y que por un regular, ye la incompetencia personificada. 

En Fevre Dream, una novela de vampiros de George Martin, l'autor, como de cutio, debuixa muit bien lo caracter de muitos d'os suyos personaches. Pero bi'n ha un que me fació particularment goyo. Sour Billy Tipton ye ixa persona, ixe encargadet, que se creye important, que siempre quier estar chefe y que nunca no en será. Un votant de Ciudadanos, un cunyau con poder, un wannabe, .... clamatz-le como quiratz. Pareixe que George tamién en ha conoixiu


[Charra Sour Billy] - (...) Julian quiere atrapar-lo. Yo foi siempre lo que Julian deseya.

- ¿Que podría fer ell sin tu? - continó Joshua. A Sour Billy no le fació goyo lo tono con que lo dició, pero antes de que podese protestar Joshua York continaba.-  Te ye utilizando, Billy. Sin tu, no sería cosa. Tu piensas por ell, actuas por ell, lo proteches durant lo diya. Tu lo conviertes en lo que ye.

- Sí - contestó Billy, argüelloso. - Sabeba lo important que yera, y le feba goyo. En lo barco encara yera millor. Tanto los negros que heba mercau como la vasuera blanca que heba achustau le teneban una cerina terrible, le deciban "sinyor Tipton" y correban a fer lo que les ordenaba, sin sisquiera haber de devantar-les la voz. En primeras, belun d'os  blancos s'heba amostrau una mica rebel, dica que Sour Billy le heba ubierto a un la pancha y lo heba feito ficar en un furno. Dimpués d'ixo, la resta se heban amostrau de tot respetuosos. Los negros no yeran mica problema, fueras de en los muelles, quan Billy los feba encadenar a las esposas que teneba instaladas en la cubierta principal ta empachar que en eslampasen. Ixo yera millor que fer de caporal en una plantación. Los caporals yeran vasuera blanca y tot lo mundo  los tractaba con desconsideración. Manimenos, en lo riu, lo primer oficial d'un barco yera un hombre con posición, un oficial, belun a qui s'heba de tener respeto.

- La promesa que Julian le ha feito ye falsa - continó York - Nunca no será uno de nusatros Sour Billy. Perteneixemos a razas diferents. La nuestra anatomía, la nuestra carne, mesmo la nuestra sangre ye diferent, Julian no puet transformar-le a vusté por muito que diga.

lunes, 20 de noviembre de 2017

La magnitut d'o problema grafico y las neutralidatz

Dica fa no guaire, bi heba dos discursos bien ixemenaus entre las activistas de l'aragonés que yo no compartiba mica, pero que trunfaban muito. La uno yera una relativización d'a importancia d'o modelo grafico. Pa entender-nos, toda ixa chent que deciba terne que terne que la grafía no importaba, que lo important yera la oralidat, que importaba igual si s'escribiba en cirilico u alchamiau y asinas asinas. Ye curioso que un porcentache significativo d'ixa chent, si sabeba aragonés, lo escribiba en una concreta propuesta grafica, pero ixo ye lo de menos. Podrianos considerar-lo casualidat.

L'atro discurso yera d'una suposada neutralidat, prenendo distancia sobre lo conflicto grafico. "A viyer si apanyatz ya isto los que tos tricolotiatz con la grafia", hemos leyiu todas un ciento vegadas. Igual como en lo caso anterior, los porcentaches d'emplego d'un modelo grafico u unatro tamién claman l'atención.

Totz dos discursos se complementaban perfectament, y feban ulor d'una pretendida altaria moral sobre qui yeranos y somos partidarias de belun d'os modelos graficos. Nusatras yeranos parte d'o problema y ellas se viyeban como espectadoras d'unas luitas que no iban con ellas. Les yeranos hodendo la luenga, pa entender-nos.

Belunas continan en ixas posturas, que contino sin compartir. Manimenos ye bien curioso, y ilustrativo, una serie de personas que, de bote y voleyo, han entendiu que lo modelo grafico ye important y han preso posicionamiento a favor d'a grafia DGPL. No en son guaires, pero si significativos, precisament por ixe cambio tant radical de opinión. Porque antimas d'haber decidiu refirmar ixe modelo grafico lo fan con una pasión que roza (u mesmo sobrece) lo hooliganismo.

No voi a qüestionar los motivos que le haiga levau a cadaun a cambiar d'opinión, pero les doi la bienvenida con toda la sinceridat. Lo modelo grafico ye una qüestion important. Prou que no la mas important, pero en ye. Pa poder concarar y solucionar los problemas, lo primero ye reconoixer que existen, entender la magnitut, saber que solucions se proposan y qui las proposa y debatir, con totz los datos, la posible solución. Agora ya tenemos a belun mas que reconoixe que lo problema grafico existe, ye important, y bi proposa una solución. Bienvenidas t'o debat.

viernes, 17 de noviembre de 2017

"La penultima bala" de Los Draps

(Iste texto lo va leyer en lo programa de Tierra de barrenaus 4x02, asinas que si quiers sentir-lo locutau, y antimas ascuitar la mosica de Los Draps, puetz fer-lo pretando lo play...)
Quan se relaciona mosica y tierra, se gosa de pensar a escape en lo folk. Los ritmos y sonius tradicionals que van pasando cheneracions a l’arreu y que nos plegoron de manera quasi miraglosa. Manimenos, si bi ha una colla en iste país que ame la suya tierra y que l’haiga feito conoixer y valurar en la resta d’o territorio, ixos son Los Draps. Y igual como no tot lo que brila ye oro, ni toda la chent que dondeya va cacegada, no tot lo que leva donzaina ye folk.

Los Draps ye una colla de mal calificar. Hardcore, punk, folk y un poquet mesmo de ska son entre las suyas influencias claras. Van naixer a la fin d’o sieglo pasau, quan se van autoeditar en l’anyo 2000, la maqueta “Terra de frontera”. Dimpués van grabar “No mos fareu callar” en 2006, y “Un crit al vent” en 2008, totz dos con Magofermin Produzions. En 2011 van anunciar lo suyo cese de l’actividat mosical. Lo Matarranya y tot Aragón nos quedabanos un poquet mes pobres culturalment.

En totz ixos anyos, Los Draps sabioron cantar-le a Lo Matarranya, la suya tierra. Y como no, fendo-lo en catalán, la suya luenga. Pero tamién van escribir sobre lo racismo, la libertad, la mosica, lo feminismo, … u los politicos fachas y corruptos, lo que les va valer una menaza de querella de man d’o Partiu Popular en 2007.

Entre as suyas fitas, tamién se i troba la cancion Matarranya, adaptación d’un poema de Desideri Lombarte, que ye sin dubda, lo suyo gran exito. Entalto lo pueblo, con la colaboración de Prau, ye una d’as poquismas cancions feitas en aragonés por una colla de luenga catalana. Y charrando de colaboracions, antimás de Prau, por los suyos discos tamién i ha pasau Azero, Visión Tunel, Temps al Temps, u Mallacán. En 2006 van ganar lo premio d’a Mosica Aragonesa a la millor canta en luenga minoritaria por Cultural Popular.

A la fin, iste anyo, y dimpués de muito tiempo sin quasi actividat, van decidir alegrar-nos la vida con la suya tornada. Los Draps son tornaus, con nuevo disco, nuevas cancions y mas rasmia que nunca. La penúltima bala, como se diz iste nuevo treballo, ye compuesta por quince temazos que, recordando-nos muito a los suyos anteriors discos, resfrescan prou lo suyo soniu. Ye decir, que fan lo mesmo de siempre, pero muito millor.

I tornan a apareixer totz os suyos temas sinyalers. Reivindicación, ruralidat, cultura popular y Matarranya. Terra, riu y montanya. Los Draps nos amuestran una vegada más l’argüello por la cultura propia, la rasmia pa  desfender-la, y actualizar-la sin perder ni un sacre d’identidat.

Lo nuevo disco les ha feito visitar Artieda, Torredarques y Zaragoza con buenismo resultau. Conciertos an que toda ixa rasmia matarranyenca s’ha espardiu a un publico entregau. Si tiens la ocasión d’asistir a un d’os suyos conciertos, no la pierdas, u t’arrepentiras.


martes, 14 de noviembre de 2017

¡¡¡Dignidat!!! (Amprau de Societat Anonima)

Societat anonima ye un blog d'ixos que preban de denunciar lo nacionalismo banal, -en zagueras ya no tant banal - espanyol. Durant buena cosa d'anyos leva denunciando tot l'odio espanyolista que han habiu d'aguantar las catalanas en cheneral y las independentistas en particular. Los articlos los escribe en castellano. Cuento que tenendo muita fe en la humanidat y creyendo que bi habrá bell lector espanyolista que talment i pueda reflexionar. Lo 20 de setiembre, empecipiaba de facto l'aplicación d'o 155 y la Guardia Civil (cuerpo policial militar, cal recordar) deteneba a 14 altos cargos d'o gubierno catalán. Societat Anonima publicaba iste articulo que leyié en lo programa especial sobre lo Proceso independentista y que hue traigo traduciu. L'orichinal lo podetz leyer aqui.

Yes estau leyendo durant anyos La Razón, l’ABC, El Mundo, El País… Has visto las televisions espanyolas… Has ascuitau las rufiertas d ‘as radios… Mesmo has visto los aquelarres de Intereconomía y 13TV. Talment te han convenciu. Talment te has creyiu lo relato. Ye lo relato oficial. Una visión d’o conflicto. Una envista. Una. Ye un relato con altavoces muit potents. Son altavoces que no deixan sentir atras voces. Voces que han estau silenciadas d’o tuyo espacio publico una y atra vegada, cada día durant siet largos anyos de firme cansera. Muitos de vusatros nos hetz feito de menos u faltau. Hemos estau los malos d’o relato. Bi heba diyas que pareixeba que las ciudatz catalanas yeran plenas de barricadas quan en realidat existiba una tranquilidat total. Se nos ha feito de menos. Se ha invadiu cadaun d’os aspectos d’a sociedat catalana ta humillar-los y ta convertir-los en poco menos que vasuera. Se ha terchiversau la Historia. Se ha mentiu. Hemos estau lo recurso electoral favorito d’os faixistas de siempre y d’a piyor d’as cuchas que podeba tener iste país. Lo vuestro país. Porque yo ya no considero Espanya como lo mio país. M’avergüenya. Con totz los suyos encantos (que en tien), con todas las suyas buenas chents (que en tien) y con todas las suyas conquistas socials (que prou que en tien) ya no lo siento como lo mio país. Ni hue, ni nunca. Prou.

Tos han seqüestrau Espanya. Tos han seqüestrau mesmo los suyos simbolos y agora ya ye la historia de qualcosa que podió estar y no estió. Tos han furtau Espanya. Debant d’a cara vuestra. Han feito d’os tres poders (mas lo quarto que ye la prensa), uno nomas. Han feito una garda d’a caixa publica como han puesto. S’han meso lo chersé en los huembros, s’han feito la bamba d’as choyas suyas como nuevos ricos, s’han chupiu de gomina y tos han furtau lo país.

Me fa vergüenya Espanya. No ye lo mío país. No tien mas prochecto que l’autoritarismo y la represión. Ixo no ye un prochecto de país sostenible. No ye un país inclusivo. No accepta la diversidat ni la suya complexidat. Y baixo lo mantra d’a unidat no bi ha que una ideya: someter a totz a LA SUYA envista monolitica d’a realidat.


A Rajoy y a los suyos lacayos, los catalans les importamos igual. Encara resuena en la ment de muitos la suya frase “me fan goyo los catalans porque fan cosas”. ¡Por favor! No nos quier ascuitar. Nunca no charra d’a carrera. No menciona las millonarias movilizacions pacificas. Un anyo sin atro. Rajoy tos charra a vusatros. A los d’o relato oficial. Rajoy ye un monologuista penible, con lo mesmo texto y lo mesmo publico cada diya: la Constitución que nos hemos dau…. la lei… l’estau de dreito…. los espanyols… ¿creyetz que nos importa ya cosa ixe discurso vuedo? Nos mueve la dignidat, lo querer estar. Nos mueve la baruca de poder decidir. Nos mueve la democracia. Somos la carrera. Dengún no tos ha dito que isto va d’abaixo t’alto. Dengun no tos ha dito que isto ye transversal. Y dengún no tos ha dito que isto empecipió quan qui tos charra de leis (y los lacayos suyos) decidioron que l’Estatut que votó lo Parlament, que votemos los catalans y que votó lo Congreso y lo Senau, heba de retallar-se. Porque sí, porque s’heba de negar que somos una nación, que nos sentimos una nación, u que queremos estar millor tractaus economicament.
Tenemos a cargos inhabilitaus, leis d’o nuestro parlamento suspendidas por lo Tribunal Constitucional, rechistros, detencions… Ye una burda prebatina de humillar-nos, de someter-nos. Y ye prou. Dica aqui hemos plegau. Quedatz-tos la vuestra Espanya. Chestionar-la como queratz. Deciditz que modelo social, politico y economico queretz. Pero deixatz-nos tranquilos d’una vegada. De bella manera, ya en hemos marchau. Y lo vuestro president sabe, ye de tot conscient, de que antes u dimpués habretz perdiu a Catalunya pa cutio. Y sabe que ell será lo president y la suya foto apareixerá en los libros de Historia.

No podemos querer a Espanya “por collons”. Ixo no ye amor. No tien ni brenca ni meya que viyer con l’amor. Rajoy nos exiche que reblemos. No ha entendiu cosa. Querebanos votar. Queremos votar. Los d’o sí, y los d’o no. Yera democracia. Yera dignidat.

jueves, 9 de noviembre de 2017

Vivir con miedo a l'Heraldo

Fa bell dia, Heraldo daba la noticia d'o curset d'iniciación a l'aragonés que ha organizau la Oficina de Luenga Aragonesa d'o Concello de Zaragoza. La noticia s'ixemenó por los retes de camín, y empliba las mias cronolochias. Lo curso, antimás, ye estando un exito dende lo primer momento, apuntando-se-ie muita mas chent que no se pensaban los organizadors. Como tot, tien lo suyo costau fosco, y poco dimpués d'arribar-me la noticia, las mias amistatz, fisicas y virtuals, m'alertaban d'os comentarios que apareixeban debaixo. Beluns en contra d'iste timido primer trango d'a OLAZ.

Tiempo dimpués, en una de tantas pleitinas d'as que tiengo por los debantditos retes, un compa me deciba que no yera tiempo de cambiar la lei de luengas por la posible alarma de l'Heraldo y me meteba d'eixemplo la noticia que comento, y a los suyos comentaristas.

No ye nuevo, lo de dar-le a lo panfletet muitas mas importancia que no en tien. De muito mas choven, facié parte de Chobenalla y de Chunta Aragonesista. Vivié muit intensament la mia militancia en todas dos organizacions, y "toqué muitos palos". Podié conoixer y compartir debatz con muito cargo publico. Y bien a soben, les sentiba ixe mesmo miedo a l'Heraldo. Lo que, antes de l'asembleya, en lo bar, u en conversa privada, yeran midas inaplazables, importantismas, y alazetz de l'aragonesismo, esdeveniban de camin d'imposible implementar "por lo que dirá l'Heraldo". Ixuplidando que la puyada de votos, diputaus y refirme social tant important que heba experimentau CHA y l'aragonesismo, s'heban dau con un Heraldo firme hostil. ¿Heba cambiau la importancia de l'Heraldo? ¿Heba cambiau la suya envista? ¿Yera una enchaquia ta no fer cosas porque no quereban sentir como les criticaban?

Anyos dimpués la historia contina. Contino viyendo muitas actitutz asinas en politicas de hue, que apedecan las suyas ideyas, por ixe miedo. Pero por lo que veigo tamién existe en las bases de l'activismo. Ye un miedo que cal vencer, u sino, lo tendremos tot perdiu. Hue daré dos razons.

La primer ye etica. No podemos permitir que un diario con una ideyolochía tant reaccionaria siga qui dicte por a on ha d'ir la politica en Aragón. No implantar politicas, u deixar de fer actos, por miedo a la columna / enciclica de Fatás, ye permitir que Fatás y la suya clica de fachas nos digan qué podemos y qué no podemos fer.
 
U mesmo pior: los comentaristas.Istos mereixen un parentesi. ¿Quantas d'as personas que me leyetz fetz comentarios a ormino en Heraldo? ¿Y en qualsiquier atro medio? La mayoría d'a chent no puet permitir-se estar tot lo diya dando mal por los comentarios d'os periodicos. Sisquiera leyer-los. Qui escribe, alavez, en ixos comentarios? Belun lo femos de cabo ta quan, como ye lo mio caso, quan bell tema nos intresa muito, u queremos deixar constancia de que existen atras envistas. Atros, lo fan por la gran cantidat de tiempo libre que tienen. Chubilaus, en un gran porcentache, que ya sabemos la distribución de voto que tienen. Y no son pocos qui lo fan por militancia politica, mesmo como parte d'o suyo treballo (remunerau) politico. ¿U creyetz que las treballadoras d'os partius politicos no son una parte important d'os comentaristas d'os medios de comunicación? Tos puedo guarenciar que no ye conspiranoia, por que isto ye qualcosa que sé perfectament que se fa, y que sisquiera me pareixe mal.

Si permitimos que los amos de l'Heraldo, quatro chubilaus, y bell liberau politico nos digan qué politicas son permitidas les damos tot lo poder. Sin pasar por eleccions, sin refirme popular, sin cosa. Nomas por lo poder mediatico que tienen. U millor dito que les damos.

Ixa precisament ye la segunda razón. Damos a l'Heraldo una importancia que ya no tien. No ye lo solo periodico en Aragón. Bi'n ha mas y, encara que tampoco no son tant diferents, en bella qüestión sí que podemos acubillar-nos en atras fuellas. La plegada d'internet ha ubierto muito mas l'abanico y, antimás d'as versions electronicas de Heraldo y El Periodico, medios como Eldiario.es ya tienen una important sección aragonesa. Ixo sin contar con medios libres como Arainfo, por cada diya mas leyius. De verdat continatz pensando que lo pueblo aragonés se informa mayoritariament por Heraldo? Cada vegada son menos las personas que lo leyen. Y por cada diya mas viellas de media. Ya ni te digo las que se leyen los comentarios. La información en papel ye agora mesmo en las tres pedretas.

Faigamos cuentas esmachinarias. Pensemos en lo total d'a población aragonesa. D'ixas personas, no todas s'informan de l'actualidat. D'as que s'informan, bi'n ha que nomas lo fan por TV y/u radio. Lo de leyer, ya se sabe que, en haber de fer un chiquet esfuerzo, ya cuesta a muitas. D'as que se informan por medios escritos, hemos de descontar a todas las que lo fan en medios nomas dichitals. Nos queda la parte d'a población que lo fa en papel, que ye muit poqueta, y las que, d'entre totz os medios dichitals, triguen Heraldo, que no se caracteriza por la gran calidat d'a suya web precisament. Tamién cal sacar d'ixa cuenta a toda la chent que, encara que leiga lo panfleto, lo faiga con esprito critico u simplament, como ye lo mio caso, ta saber "que piensa l'enemigo". Qué nos queda? Los que ya votan a la dreita. Los que continarían votando a Azcón, Beamonte y Rajoy, encara que invocasen a Cthulhu ta que se minchase a totz los primochenitos espanyols.

Alavez qué miedo bi ha? Qué puet fer l'Heraldo? Alticamar a los suyos? Ixo lo fan La Razón, ABC, 13TV, ... y en zagueras mesmo El País y la SER. L'Heraldo, y la suya horda, te va a criticar igual tanto si fas un curset en los Centros Civicos de Zaragoza, como si modificas de punta ta coda la Lei de Luengas ta guarenciar los dreitos lingüisticos d'as comunidatz aragonesofona y catalanofona d'Aragón. Asinas que, como nos van a criticar igual, faigamos lo que cal fer, tiengamos claras las ideyas, y cambiemos lo miedo de bando. Que a lo panfletet no se l'ocurra tornar a insinuar que "l'aragonés son paroletas de l'espanyol" sin que todas las institucions en saquen la suya publicidat, por eixemplo.

lunes, 6 de noviembre de 2017

Tierra de barrenaus 4x02. Bolivia, Mullers y cordials y Esfendemos as luengas

Con l'agorrada ya encetada, plega lo nuevo Tierra de barrenaus radio, pleno d'iniciativas feitas por aragonesofablants. Que no se diga que nos quedamos quietas ni un minuto! 

Empecipia iste nuevo programa con la entrevista a Diego Marín Roig, autor d'o libro "Bolivia desde las voces del pueblo", una replega d'entrevistas feitas a diferents activistas de toda mena en Bolivia en 2014. Un libro pleno de reflexions sobre los procesos d'empoderamiento popular, la soberanía, las contradiccions d'a izquierda y muitas cosas mas. En un momento an que en Europa no acabamos de trobar garra alternativa con prou rasmia como ta ganar-le lo chuego a lo neoliberalismo, talment calga chirar-se ta Latinoamerica ta mirar las leccions que nos dan diya par d'atro.

Muller y cordials, lo fanzine feminista somarda en aragonés, torna t'as carreras, y me fan la honor de pasar-se por lo programa a charrar d'o fanzine, d'os suyos contenius, de feminismo, de l'aragonés, ... y lo fan, como siempre, con la suya somardería y humor. Un fanzine imprescindible que todas trobabanos a faltar. 

La tercer entrevista ye con Chuserra de Esfendemos as luengas. Una iniciativa que denuncia los malos tractos que sufre l'aragonés por cada diya en medios de comunicación, y en las politicas publicas. Situacions que a soben pasan d'amagatons por los medios, pero que Esfendemos as luengas i mete lo foco, ta analisar ixe nacionalismo lingüistico banal tant cutiano. Femos un repaso d'a suya faina y reflexionamos bell poquet sobre la situación de l'aragonés.



Y antimás, resenyo lo nuevo disco de Los Draps, contina lo concurso que quedó desierto en l'anterior programa, y muita buena mosica. Qué mas puetz demandar?  Pues una videofatera ta anunciar-lo, por qué no?



Ascuita-lo u descarga-te-lo dende punchando en iste vinclo.

viernes, 3 de noviembre de 2017

En ascuitando... Renaixem, de Xavi Sarrià

S'ha encertau que lo disco de Xavi Sarrià, cantaire d'Obrint Pas, va editar-se lo mes de setiembre. Malas que salió, prou que va baixar-me-lo y ficar-me-lo en lo MP3 pa escuitar-me-lo terne que terne, como foi con todas ixas mosicas que entrarían en la banda sonora d'a mia vida. Pero antimás, setiembre de 2017 ha esdeveniu un mes muit intenso politicament y personal. Lo suyo disco L'esperança entre les dents, lo va mercar un 30 de setiembre, la vispra d'o refererendum, en la botiga Partisano de Barcelona. Lo mesmo 1 d'octubre, en la gara d'o tren que me levaba de Barcelona ta Zaragoza, entre que ordenaba los mios pensamientos y sentimientos por tot lo que yera pasando arredol de yo, Xavi Sarrià sonaba en lo MP3. 

En totz istos diyas, lo disco s'ha iu fendo parte d'a mia vida, con ixas letras tant plenas de optimismo y luita que ya escribiba en Obrint Pas. Ista, la traducié ta lo especial de Tierra de barrenaus que facié sobre lo Proceso independentista de Catalunya, y aquí la tenetz. 

Renaixemos:
Renaixemos de la luz de l’albada
y lo sol que nos crema cada diya
l’instinto d’a fieras feroches
lo vuelo d’os muixons
las furas olas.
Renaixemos de creyer en nusatros
d’as radices que sostienen los arbols
La leyenda d’una resistencia que nunca no vencerán
Renaixemos de l’antiga sabiduría
d’as mans que treballan la siembra
Renaixemos d’a tuya calida riseta
l’audacia de sentir-nos libres
Fillos de l’augua, la tierra y lo fuego
renaixemos con tu
y con tu venceremos
Renaixemos d’as tardadas royas
en las carreras d’a nuestra nineza
L’alegría humilde en las caras
la emoción cantada con la voz trencada
Renaixemos d’as chestas d’o pueblo
celebradas con ploros y abrazadas
La polideza de vivir la vida
sin reblar
Renaixemos de todas las feridas
escritas en las piels mestizas
Renaixemos d’a perseverancia
de luitar con la viella asperanza
Fillos de l’augua, la tierra y lo fuego
renaixemos con tu
y con tu venceremos
Renaixemos d’o ciel cubierto d’estrelas
la luna grisa entre las brancas
Lo viento que se leva los miedos
la clamada salvache, la rumor d’o bosque
Renaixemos d’os nuestros orichens
Las parolas que mantenemos vivas
Los versos que recuentan la historia
d’un antigo legau
Renaixemos d’as guerras que se libran
en las vals foscas d’as nuestras vidas
Renaixemos de todas las redotas
Si hemos cayiu, nos devantaremos mil vegadas
Fillos de l’augua, la tierra y lo fuego
renaixemos con tu
y con tu venceremos


miércoles, 25 de octubre de 2017

Racionalizando l'independentismo

Si a los conflictos nacionals de qualsiquier mena les sacamos todas la pasión y la parte identitaria, talment podamos plegar en solucions d’una manera civilizada, que ye como s’habrían de fer las cosas en lo sieglo XXI. Sé que ye dificil, en haber-ie qüestions identitarias y simbolicas, y pa solucionar ixas qüestions caldrá atras solucions. De feito tamién caldrá que la solución a los problemas racionals (por decir-les de bella traza) pase por la solución d’os problemas identitarios y simbolicos. Pero pa ixo, primer cal conoixer-nos

Qué quiere un independentista?
Un independentista no ye necesariament nacionalista. L’independentismo, por definición, postula un estau propio pa un territorio que no en tien. No lo fa, necesariament, por una pretendida superioridat cultural (ixo sí que ye nacionalismo), ni por odio a l’atro, ni por no querer charrar la luenga colonial, … cadaun lo fa por qüestions diferents. Bi’n ha que son indepes por qüestions identitarias, bi’n ha que por economicas, y bi’n habrá de tot. Mesmo belun que por una simpla moda. Pero lo que los une a todas, y concretament en lo caso catalán ye evident, ye la voluntat de tener un estau propio.

Podríanos simplificar una definición d’estau como un conchunto de institucions y poders que organiza lechislativament la vida d’o pueblo que se suposa que represienta. Ye decir, basicament, ye un espacio lechislativo. Lo que distingue a los ciudadans espanyols d’os franceses, ye que se richen por leis diferents. Lo que se pretende en creyar un nuevo estau, si olvidamos por un momento la qüesitons identitarias y simbolicas, ye ixo: tener un tarabidau lechislativo diferent. Y independient, en la mida en que lo son los estaus d’o sieglo XXI. Ixo, y ni mas ni menos que ixo.

A la fin, tot ye un problema de legalidatz. Pa tanto ye ixo?

La identidat nacional
La identidat nacional ye propia. Como todas las identidatz individuals y colectivas. “Lo que mete en lo DNI” ye la CIUDADANÍA. Yo soi ciudadano espanyol, prou que sí, porque son las suyas leis las que he de cumplir. Pero la mia identidat nacional no ye espanyola. Yo no soi espanyol, porque no siento que la espanyolidat siga parte d’a mia identidat personal. Ye una opción personal y no ye tant dificil d’entender.

Te lo explico, amiga espanyola. Tú yes espanyola. Te sientes espanyola. Tremolas quan gana la selección en bell esporte, t’encanta la suya luenga universal charrada por chococientos millons d’humanos, y todas ixas cosas. Si marchases a vivir difuera (u quan has marchau a vivir difuera), has continau estando espanyola, ¿no?. Mesmo si t’heses de cambiar legalmente de nacionalidat, continarías estando espanyola. Empadronar-te en Düsseldorf no te faría deixar de celebrar las victorias de La Roja. A que no? Lo puesto an que naixes tampoco no ye determinant pa cosa. Emilio Aragón, u Alaska son espanyols y muito espanyols, a qué sí? L’uno naixió de Cuba, y l’atra de Mexico.

La identidat nacional ye qualcosa intima, sentida por una nomas, y que dengún no puet imposar a atro. Por muito que me digas que soi espanyol, ixo será una qüestion legal, no pas identitaria. Ciudadanía ye en l’ambito d’o legal. Nacionalidat en lo sentimental y identitario. Ye important saber distinguir-lo. Y respetar-lo.

Pa qué un estau propio?
Juan Carlos Moreno Cabrera feba un simil charrando d’as luengas y las normas cultas. Ell deciba que a una luenga no le cal, en primeras, una norma culta, ni autoridat lingüistica, ni sisquiera grafía común. Igual como a las personas, ta sobrevivir, no nos cal, en primeras, ropa. Podemos ir espulladas. Pero en las sociedatz que vivimos, a la chent le cal portiar ropa la mayoría d’o tiempo, y a las luengas les cal estandars, autoridatz y grafías ta poder sobrevivir. A las culturas y luengas minoritarias, a las nacions sin estau propio nos pasa qualcosa pareixida. Si se respetasen los mios dreitos, la mia identidat, luenga y cultura, probablement no sería demandando un estau propio que las protechese. Si Aragón no fuese tractau sistematicament como una colonia d’an que sacar recursos, talment creyese mas en ixe teorico “cafe pa totz”. Pero como ixo, ni pasa, ni pasará, mientras Espanya siga Espanya, nos cal un estau propio. No pa refusar atras culturas, identidatz u luengas, sino pa que qui no somos en las hechemonicas, tamién podamos exercer los nuestros dreitos y vivir las nuestras identidatz con normalidat.

Talment caldria desapasionar lo discurso independentista, como de feito se ye fendo en una ampla parte de l’independentismo moderno. Tot iste renombramiento d’as nuestras ideyolochías como “empoderamientos”, “soberanías”, y atras, cuento que va precisament en ixa linia. Lo identitario, simbolico y emocional ye important, prou que sí, pero ye mas important explicar qué ye lo que queremos y por qué. Vulcar tot lo discurso espanyolista dende lo politico, y no pas dende lo simbolico. Desfender la viabilidat d’as nuestras propuestas socials, politicas y economicas.

Bi ha dos grupos de personas con que tenemos firme faina en iste sentiu d’haber-nos d’explicar-nos bien. La una son todas ixas que, sin estar especialment espanyolistas, en istos diyas s’han alticamau y mesmo han penchau la estanquera en lo balcón. Sí, n’i hai. Ye dificil y cal paciencia a-saber-la, pero tenemos argumentos arrienda pa explicar-les las mentiras que les son contando y, sobre tot, que bi ha un prochecto alternativo y inclusivo con todas las identidatz, siempre que respeten a la resta.

L’atro, ixos suposadament internacionalistas, que meten como problemas iguals a l’independentismo catalán (sin diferenciar CUP de JxS, por eixemplo), y a l’espanyolismo que ocupó policialment Catalunya. Mesmo muitas d’istas personas tienen una formación politica prou gran y, manimenos, no aduben a entender lo que bi ha dezaga d’un y atro movimiento politico. D’istos, en he conoixiu qualques y, quan les n’explicas, a lo menos les fas reflexionar bell poquet. Conoixer-nos y ascuitar-nos con respeto, siempre ye bueno.

Los independentismos y las independentistas somos probablement las que demandamos una democracia mas radical. Hemos treballau mas que garra atro movimiento politico los conceptos de soberanía y identidat, que serán vitals en los desarrollos politicos d’o que queda de sieglo. Tenemos un marco teorico inmillorable, an que hemos superau muitas d’as nuestras contradiccions historicas. Agora nos cal saber explicar-lo y ixemenar-lo, dende envistas purament racionals pa, sino conseguir una masa critica que crebe con lo sistema, lo menos sí fer cayer las resistencias entre las nuestras aliadas potencials