lunes, 15 de febrero de 2010

¿Qué ye pasando? (I)

Creigo que a situación economica y social que somos vivindo agora no ye ta posar-se contento. Muita chent ye viyendo como se queda sin poder bosar as facturas, muitas han de tornar-se t'a tierra que no'n fa tanto les vido marchar y as que tenemos treballo hemos de fochar firme sin tartir por medrana a perder-lo. Manimenos, a situación sí que podeba tener, u talment haber teniu, o costau positivo. O capitalismo ha dentrau en una gran crisis d'ixas que, de cabo ta quan, y por definición d'o propio capitalismo ha de tener. Totz os defectos d'os capitalismo se fación visteros en tasament una anyada. Nos fación una treballo de propaganda, a las anticapitalistas, que garra campanya global nos hese puesto fer nunca.

Debant d'a situación anterior, an que a más pobrichona treballadora teneba PlayStation y marchaba os cabos de semana en Ryan Air a viyer Estrasburgo (tot sin poder mercar una casa, ixo sí), agora ixa mesma treballadora ha perdiu lo treballo suyo, ha de vender os chuegos d'a Play ta bosar a hipoteca de trenta anyadas y os cabos de semana va ta casa Mai a minchar micolas y portiar-ne bella docena más en a fiambrera, entre que le demanda bella aduyeta ta conseguir zarrar o mes sin numers royos.

L'anticapitalismo habría d'estar recibindo milenta afiliacions, milenta simpatías. As masas treballadoras, que dicen por atros blogs, habrían d'estar releyendo a Marx y cremando as siedes d'os bancos, os partius capitalistas, as inmobiliarias, os sindicatos oficials y toda ixa chentucia que nos ha levau ta iste cabo. A posibilidat sisquiá de fer unatra expo u fatera parellana en a tierra nuestra habría de, como poco, carranyar a la población. ¿Por qué no ye pasando isto?

De feito, ¿porqué os partius y organizacions de extrema dreita sí que son aprofitando a situación (encara que no masiau, afortunadament)? ¿Por qué l'ultracatolicismo y atras relichions sí que suman milenta d'intolerants fanaticas?

A cucha alternativa sí que'n tien d'ideyas, sí que'n tien de solucions. Ta yo en tien prous, dende fa muito, y prou que dende muito antis d'a crisis. No creigo que o problema siga no tener solucions u respuestas a os problemas d'agora, d'ayere u de maitín. Puestar que o problema siga como las podemos transmitir, qué podemos fer debant d'a desinformación y a sobreinformación (que deciba Fermín), qué meyos hemos de fer servir ta que toda ixa masa d'esqueferadas, de personas acarrazadas a treballos penibles por no tener alternativa, tiengan un referent ideyolochico alternativo a o capitalismo actual y prou que a o capitalismo cheneral, como ideyolochía y como praxis acotoladera d'a humanidat (en totz os sentius d'a parola).

Prou que no conoixco a respuesta ta tot isto. No sé por qué a chent no ye emplindo as organizacions anticapitalistas, ni por qué no plegamos en ellas, ni tantas y tantas cosas. A situación actual ye de dificil analizar ta yo, encara que sí que creigo tener bellas explicacions parcials de por qué somos perdendo a partida, con totz os comodins en a man. Pero ixo ye t'atro diya (continará?)

1 comentario:

Florencio dijo...

A chen encara tiene fe en o capitalismo, y en parti con razón, porque as alternatibas que han surtiu no han funzionau.

Ta yo lo capitalismo triunfa porque ye o sistema que millor se adauta á la mentalidá umana. O problema de o comunismo u anarquismo (y sistemas afines) ye que uno d'os suyos prenzipios ye que somos animals razionals y por ixo pararemos cuenta de que cuan un sistema ye insostenible cal cambear-lo.

Pero no, no somos animals razionals, podemos razonar, pero no somos pas animals razionals y mos mobemos por o benefizio más inmediato (suposo que ye en os nuestros chenes) y ta ixa mentalidá o capitalismo ye ideal.

Por ixo cada begada soi más combenziu de que l'unica traza de cambear ye empentando lo sistema y dixar de fer cosas que, en primeras, aduyan á o planeta pero que con o sistema capitalista rulando, l'unico que fan ye postergar o cambio real.
http://desdebanarus.blogspot.com/2009/11/la-solucion-para-el-planeta.html

http://desdebanarus.blogspot.com/2010/01/favor-del-cambio-climatico.html