domingo, 27 de diciembre de 2009

Goyoso anyo nuevo

Ya queda poco ta rematar l’anyada y ARA cultural nos ha quiesto felicitar a nueva anyada con un video repincho que podetz viyer más t’abaixo u visitando o blog suyo. Tamién ARA, ha quiesto que pasemos unas fiestas d’ivierno bien calients, leyendo as marranadas que nos rezenta Lola Dolç en o libro de relatos eroticos en aragonés “Luengas enreligatas”. Ye una sobrebuena altertativa ta fuyir d’a programación de TV nadalenca, tan rebutient d’horteradas, ninas, debuixos y zintas repetidas por quincena anyada seguida.
Por si no torno a escribir, que sirva iste video como felicitación de cabo d’anyo de Tierra de Barrenaus.


lunes, 21 de diciembre de 2009

Lotería de Purnas

Cuento que muitas, por no decir todas, as lectoras de Tierra de Barrenaus conoixeretz Purnas. Por si no ye asinas, tos comento que totz os años comparte con as lectoras suyas un numero de lotería, o 420, con a unica condición de que escribamos cualcosa en o blog suyo. O resultau ye bien majo. Arrienda de chent escribindo-ie de tot en diferents luengas. A mía chicota alportación la pencho tamién aqui, encara que tos animo a que leigatz todas as falorietas penchadas en Purnas:

Levaba 20 minutos treballando y ya yera canso de tot. Farto d'a chentucia que no feba so que consumir, sin nian parar cuenta d'a existencia suya. Cuatre personas puyaban por a escalereta mecanica. Yera a familia tipo. Pai, mai, nino y ninona. Os dos catrins feban ixe estrapaluzio que tantismo mal le feba en os oyius suyos. Con tot y con ixo heba de ganar-se o chornal asinas que s'endrezó enta els. Sin tiempo ni ta tartir, o pai le fotió un: “¿Sincusa, sabes aón pegan os muebles de cocina?
Alavez esclató y chilando “No soi d'información!!!!” blincó dencima de l'ombre y pretó a foter-le punyadas. Diz que calió tres personas de seguridat ta rancar-lo d'astí dencima. Diz que años dimpués, en o psiquiatrico repetiba terne que terne “no soi d'información, no soi d'información....”

2 fotos chenials

Un chiquet post nomás ta penchar-tos dos fotos chenials. Prou que no por a calidat suya, que ya sabetz os míos nulos conoiximientos sobre fotografía. Ye por a chenialidat de dos personas. A primer, a que fació a pancarta que trobé en Pont de Montanyana. Ye un lugarón repoliu d'a Ribagorza que tos recomiendo que visitetz. (cuan tienga bel ratet pencharé fotos en Flickr de Barrenaus). Os vecins i son fendo una campaña contra que s'esboldreguen as escuelas u bella cosa parellana y una d'as muitas pancartas que teneban penchadas en as balconadas deciba "Queremos respuestas fehacientes". Pocas vegadas he visto fer servir ixa parola en una pancarta. Me remeró a lo lugar de "Amanece que no es poco". De seguras que en Pont de Montanyana han copiau a Faulkner....

L'atra chenialidat ya ye en plan somarda, pos cal estar capín u muito fato (u boque) ta fer un carril bici como iste que trobé en a marguin cucha, muito amán d'an que se fació lo concierto d'o 20 d'aviento. A luz no yera guaire buena, pero cuento que se vei bien, mesmo l'arbol en metat d'o carril.


miércoles, 16 de diciembre de 2009

Cabo de semana nacional

Nomás cuatro ringleretas ta convocar toda a cantidat de cosas que bi ha iste cabo de semana. A yo me toca de treballar y no podré ir ta tot, asinas que habretz de lebar-ie un monchón ta que chile por yo.

O sabado de maitins toca a -ya tradicional- manifestación contra o sinyal español a las 12 en a plaza S. Miguel. O manifiesto lo pencharé contino. De meyodiyas podetz chentar en A Enrestida con ixe lema de “dengún plato ta zaga” (que m'esmeliqué en leyer-lo). Cal chentar firme, que de tardis se torna t'a carrera a manifestar-se en solidaridat con Egunkaria y a libertat d'expresión y de prensa. Ya de nueis, prencipia la borina en un conciertazo que tamién organiza A Enrestida. Los Draps, os antigos Inadaptats, Magnetophones... O puesto no ye guaire bueno, pero l'ambient regular que'n será!. Chobens y UCA continan tamién organizando as Chornadas por os dreitos y libertatz (¿nacionals?) d'Aragón, que, encara que en ista edición no bi ha que una charrada, parix prou intresant.
Con tot isto y, habendo de treballar, no sé si conseguiré sacar bel ratet ta visitar o Salón d'o comic que tamién se fa mientres o cabo de semana.....

MANIFIESTO
En 1591, o Chustizia d´Aragón Chuan de Lanuza V, fendo serbir os Fuers d´Aragón, y dimpués d´un luengo prozeso chudizial, falló de traza contraria a os intreses d´o rei Felipe II de Castiella y I d´Aragón. O prozeso y as reazions d´o rei prebocón l´enoyo de muitos aragonese que leboron a una botinada ziudadana. Carranyoso, inbadió y ocupó melitarment o Reino d´Aragón. Efeutibament, Chuan de Lanuza estió executau y decapitau per oposar-se a que os exerzitos extranchers de Felipe II de Castiella dentrasen en o nuestro país. A suya cabeza tallada estió amostrada a o publico mientres más de cuatre anyos, y os cuerpos decapitaus d´os prenzipals mainates abotinaus, penchaus sin tozuelo en as murallas d´a ziudat per espazio de más de 20 anyadas. A razón siempre i estió, per tanto, de parti d´Aragón.
Contamos que, en razón d´o debandito, l´izau d´o granizo sinyal espanyol ye una manca de rispeto a iste pueblo per diferents razons:
1.- En primer puesto, per lo que suposa ficar-ie una bandiera d´os asesinos d´o Chustizia d´Aragón cara ta él. Tos prexinatz meter una gran bandiera franzesa bofetiando a Agustina d´Aragón? De seguras que no pas. Pos nusatrxs tampoco no queremos que´n suzeda en Zaragoza. O molimento a o Chustiziazgo ya en tien prou con estomacar en un costau l´edifizio d´a Capitanía General, l´exerzito, siempre garant d´a unidat indibisible d´a suya quiesta Espanya.
2.- Perque a ziudadanía aragonesa no ha estau consultada sobre a colocazión d´ista. Plantar o sinyal en a plaza d´Aragón ye una dezisión caziquil y coautiba d´o nuestro alcalde, a tamás d´as queixas que n´han surtiu. En a mesma clau de carenzias democraticas, cal dezir esclatero tamién que a bandiera que s´ha penchada no ha estau esleixida per dengún de nusatrxs como ziudadanxs; ye un sinyal imposau en o tristament zelebre golpe d´estau faixista de 1936. Dengún no s´esmaxina meter en Alemania u Italia un sinyal d´as suyas dictaduras correspondients. Pero aquí en bale tot.
3.- Debant d´un molimento zebil a l´esfensa d´a legalidat y as libertatz, o PSOE nos ha traita una bandiera melitarista, de man de melitars, ta fer omenache a las “bertutz” melitars. A plaza d´Aragón ha deixau de fer omenache a qui s´estimó más, a costa d´a suya bida, de disolber un exerzito, l´aragonés, antis que no ocasionar una esferra, ta estar l´epizentro d´os ereus d´os abotinaus d´o 18 de chulio de 1936.
O “present” que queremos d´o Ministerio de Defensa no ye o suyo sinyal; queremos a rebersión de totz os espazios que tien en o suyo poder l´exerzito. Queremos dentrada de totz y todas os ziudadanxs de Zaragoza a las piscinas melitars d´o Soto de L´Almozara, queremos que nos retornen o control zebil de l´aeropuerto de Zaragoza, queremos que deixen d´abentar bombas en o poligono d´As Bardenas y queremos que nos rebiertan o poligono de tiro de San Gregorio que ocupa más d´un terzio d´o termino monezipal de Zaragoza, y ta que a situazión siga encara más sangrant en rezients calendadas emos sufriu un inzendio en a zona melitar anteriorment dita y s´ha comprobau o talant dictatorial y faixistoide de l´exerzito espanyol, trespasando a güega d´o poligono de tiro y fendo perdidas per balura de 7,5 millons d´euros que como gosa de pasar-ie y estando un afer d´esfensa “nacional” no podemos dezir-ne ni brenca ni meya. Colonialismo en estau puro.
Tamién desichimos que l´autual Chustizia d´Aragón, Fernando García Vicente, ubra expedient ta sacar-ie ta cutio o sinyal colonial espanyol, más que más cuan en istos intes o Conzello de Zaragoza ye incumplindo de traza esclatera a lei de bandieras que en teoría abría de rispetar, en aber retirau d´o suyo costau as que bi n´eba d´Aragón y Zaragoza, pero como ya emos dito, aquí en bale tot.
Por más que le faiga duelo a l´alcalde, Sr. Belloch, Zaragoza ye a capital d´Aragón, y ni negando a existenzia d´a Comarca de Zaragoza, ni sacando a cuatribarrada d´os taxis u d´a Expo, ni ficando sinyalotas frent a o Chustiziazgo, Zaragoza deixará d´estar Aragón.
MOBILIZA-TE CONTRA LA SUYA BANDIERA
ESPAÑOLA AU D´ASTÍ!
DIFUERA O SINYAL ESPANYOL D´A PLAZA D´ARAGÓNConboca: COORDINADERA CONTRA O SINYAL ESPANYOL

miércoles, 2 de diciembre de 2009

L'enemigo catalán

En zaguerías, y más que más, dende a trobada d'o fosal de Pietro III d'Aragón me son plegando arrienda correus y mensaches catalanofobos dende muitos cabos que no m'asperaba. Siempre me plegan mensaches d'ixa coda y me floren muito. Bellas vegadas mesmo tienen razón en parti u tot lo conteniu suyo, pero sé que se fan dende a ignorancia, os topicos y, masiau asovent, ixe espanyolismo vanal que tanto mal nos fa.

A historia ye una disciplina prou rebordenca. Ta prencipiar ye una ciencia social y, alavez, se puede interpretar (que no ye lo mesmo que falseyar). No ye la mesma ta todas. Ta continar cal estudiar-la muito ta saber-ne bel poco. A chent gosa d'estar conscient de que no sabe mica sobre fisica y no presume de saber-ne. Manimenos, a pur de repetir topicos estendillaus a bando por bellas intresadas, muita chent crei que sabe d'historia.

Asinas que prebaré de dar a mía modesta ambiesta sobre bellas custions d'a politica y d'a historia aragonesa, catalana y espanyola.

O enemigo no ye Catalunya. Catalunya, a más gran parti d'o tiempo nian sabe que existimos. A Catalunya, Aragón rai. L'enemigo d'Aragón no ye Catalunya, pero a l'españolismo y a o baturrismo (que no ye que espanyolismo con cachirulo) le fa muita honra que as aragonesas continemos pensando ixo. D'eixemplos bi'n ha un trapazil.

O zaguer trasvase, enemigo reyal que consiguió que as aragonesas salisenos ent'a carrera un diya par d'atro, que nos tornasenos a sentir identificadas con o sinyal nuestro, no estió una demanda de Catalunya. Encara que sí que bi iban bels hectometros, as cansas que dión mal, y que continan dando-ne estión as valencianas y as murcianas. Agora que ya no ye de moda, Valencia y Murcia tornan a estar amiguicas nuestras y tornamos a mirar-nos enta Catalunya mirando l'enemigo. Ixublidando, antimás que, estió gracias a ellas y, más que más, a ERC que no bi ha trasvase. Aragón no pinta cosa en Madrid pero, t'a part d'alavez, ERC, qui s'oposaba a ixe travase i pintaba. Y muito. Ye Valencia l'enemigo oficial d'Aragón? No. Ye Catalunya. As que nos salvoron.

En Salamanca bi ha documentos furtaus por as nacionalistas espanyolas en a Guerra Civil. Furtaus de todas as cantonadas de l'Estau espanyol. Tamién d'Aragón. Cuan a Generalitat catalana, los demanda, be-te-me que, en Aragón, en cuenta de demandar a nuestra parti, nos metemos de parti de as ladronas y, sale un camatón de chent contimparando-lo con os biens d'a Franja. O qué pasa alavez? Que nos quedamos sin biens y sin papels. Y a mala oficial contina estando Catalunya, a tamás d'estar o Estau espanyol qui contina furtando-nos parti d'a nuestra historia, y a D.Ch.A. qui no fa mica poder por conseguir que torne a documentación furtada.

Cuan, en 1707, Felipe IV d'Aragón decretó a suya conquista d'o nuestro país (viyer documento aquí) y nos furtó a nuestra independencia (encara que t'a part d'alavez yera más administrativa que no reyal) no sabeba o bien que lo eba feito. Nian podeba preixinar que en 300 anyos ixublidaríanos de tot qui nos furtó o país. Qué tratamiento le damos en Aragón a ixa parti d'a historia? A la parti más important d'a historia aragonesa?. Penible! En a exposición que bi habió l'anyo pasau en a Lonja zaragozana, cuasi ni se'n charraba. De bote y boleyo, Aragón deixaba d'estar independient. Por arte de machia. Abracadabra. Sin muertos ni cosa parellana. En Aragón Radio fan una seczión sobre os reis d'Aragón. L'atro diya tenié a suerte de ascuitar chusto o capitol adedicau a Felipe IV (V de Castilla). D'el deciban asabelas cosas. Un camatón de datos. Y d'entre totz ixos, que fació unas reformetas que rematoron con os fueros aragoneses. Ixo sí, respetando o nuestro dreito privau. Ixublidoron tot lo dreito de conquista y que en un primer inte, tamién estricallaba o dreito privau. Siempre que se'n charra parix que sacar os fueros sía cualsiquier cosa fateta. Como qui fa una visita a Zaragoza y se'n leva un recuerdo. Que son os fueros, que no ye un alzaclaus de Flufi! En o 300 cabo d'año no se fa mica acto oficial. Manimenos en o 200 cabo d'año d'o naiximiento de l'Estau espanyol moderno y, en buena mida, d'o nacionalismo español moderno, se fan actos por tot lo país. Dica gomecar. No querebas historia? Pos tiene-ne, pero de la que queramos nusatras... Enemigos a monarquía borbonica, u os castellanos por furtarnos a independencia? No pas! Metamos un sinyal chigant suyo en o monumento a qui esfendió os dreitos nuestros y morió por ixo. L'enemigo reyal, l'enemigo oficial ye Catalunya, que tamién se quedó sin independencia en ixa mesma guerra.....

En o trestallo de mentiras historicas, en fan todas. Catalunya fa una interpretación da historia dende o sieglo XIX que ye una mica etnocentrista, ye verdat. Pero no ye tan aluenyada d'a reyalidat como atras que fan por aquí. Asovent siento en as clases mías u como topicos en a carrera, ixo de que “Cuan Catalunya yera d'Aragón”, “Catalunya yera un camatón de condadetz” u mesmo, la millor de todas, “cuan Aragón invadió Catalunya”. Ista chent son los que se suposa que saben d'historia y los que critican cuan charran d'a corona catalanoaragonesa. Lo d'a corona catalanoaragonesa, ye una interpretación d'a historia y dengún no diz que ixe termino haiga existiu antis d'o sieglo XIX. (Y si lo diz ye un carnuz, que en Catalunya bi'n ha tantos como en atros puestos). Pero lo de invadir Catalunya ye una barbaridat historica tan gran, que habría de meter roya como un ababol a qui lo dezise. Aragón y Catalunya se chuntón como iguals. A dignidat reyal pasaba por a branca aragonesa, ixo ye verdat. Ramón Berenguer IV nunca no estió rei. Pero Catalunya no yera d'Aragón. Yeranos iguals. Y Catalunya no yera un camatón de condadetz a l'ora de funcionar como unidat. Eixemplo bien platero ye o Compromís de Caspe, t'an que fuoron como uno y an que os tres territorios (Aragón, Valencia y Catalunya) teneban o mismo ran. Iguals os tres.

O Vidal Mayor, que tamién estió en a devandita exposición d'a Lonja, ye o documento más important d'Aragón. D'a historia aragonesa. Una replega d'as nuestras leis, escrita en aragonés y una alfaya en tantos y tantos sentius. Bella cosa parellana a la Bill of Rights estadounidense, pero muito más antiga. Que aón ye? No pas en Aragón. Ni en Catalunya. As catalanas no nos lo furtoron. Ye en California. Ye o nuestro enemigo o fato que lo vendió? No. Ye l'enemigo California u USA? No, por favor, que tienen bases aquí! Ye l'enemigo a D.Ch.A. que nian lo demanda? No pas, mozet. L'enemigo ye Catalunya que pilló los biens d'a Franja. (Que tamién cal charrar-ne y bel día lo feré).

O estatuto que tenemos pude. Os estatutos que hemos teniu pudiban. Os estatutos que tendremos pudirán. Porqué? Yo creigo que puede influyir o feito de que os diputaus que pactoron con l'Estau o primer estatuto nos metesen por a clamada vía lenta. Un d'ixos yera Biel, por cierto. Un d'ixos que tien como enemigo a Catalunya y a cualsiquier cosa que parixca catalana. Un d'os mayors y piors catalanofobos. Tamién puede influyir o feito de que os politicos d'o PSOE y o PP lo que quieren ye medrar en o partiu y ta ixo no cal endizcar a o PSOE y o PP espanyol. Si yes callau y no das guaire mal puetz rematar en Madrid. Y si no que pregunten a Rudi, Lanzuela, u Eva Almunia. Puede influyir o feito de que, cuan os catalans fan un estatuto an que demandan una serie de cosas, en cuenta de copiar-lo punto por agulla, lo denunciamos y aquí en femos uno que no demanda ni chisla. Qui ye l'enemigo d'Aragón? Os que pactoron os diferents estatutos? No! L'enemigo oficial ye Catalunya por esfender os suyos dreitos y intreses.

Y la rematadera. Historicament en Aragón bi ha habiu dos luengas. Aragonés y catalán. En o reino y en a Corona. Documentos ta probar-lo bi'n ha arrienda. Os filologos de tot lo mundo reconoixen a l'aragonés como luenga y dicen, sin mica duda, que lo charrau en a parti oriental d'Aragón, a clamada Franja, ye lo mismo que se charra en Catalunya, Valencia, Mallorca... Pero aquí, en Aragón, tenemos a las más saputas de todas. Y mesmo as zapateras han feito filolochía. Y surte como fongos chentota demandando que no s'impose o catalán. En una d'as más grands mentiras que nunca no s'ha feito en Aragón. O prochecto actual de lei de luengas, fa pena d'o feble que ye, y mesmo puestar que la rebaixen, si ixo ye posible. A unica luenga que bella vez s'ha imposau en Aragón ye o castellano, fendo retacular a aragonés y catalán dica que o primer ye en as tres pedretas y o segundo ye amarguinau socialment en muitos puestos. Dica o punto que nian muitas que lo fablan gosan de decir-lo, no sía que creigan que son d'ERC. Ye l'enemigo o castellano, verdugo d'as luengas aragonesas? Son enemigos d'Aragón qui nos niegan o dreito d'aprender y expresar-nos en as nuestras luengas? No. L'enemigo oficial ye Catalunya porque.... Isto ya ni sé porque ye.

No. En a mía opinión l'enemigo no ye Catalunya. Ye más, a yo no me cal un enemigo. A o Gran Chirmán sí que le caleba. Y le'n cal. Enemigos míos son l'imperialismo economico y cultural. O d'Estaus Unius, o espanyol y tantos atros. Enemigos míos son os que niegan as reyalidatz cientificas y historicas. Os que dicen que Aragón invadió Catalunya, que a Guerra Civil prencipió en 1934, que lo que se charra en Fraga no ye catalán, que a teoría d'a evolución ye mentira u que no se matoron chodigos mientres a II guerra mundial, por eixemplo. Enemigos míos son los que nos niegan dreitos individuals y colectivos, y Catalunya no me'n ha negau mica.

Aprendamos todas de todas. Ni a las catalanas ni a las aragonesas nos cal inventar mica historia. En tenemos una bien polida, plena de aciertos y errors, de glorias y penas y, en a suya parti más gran, feita de conchunta. Conoixcamonos y treballemos chuntos, que muita más honra nos ferá que no ista absurda situación d'agora.