miércoles, 25 de febrero de 2009

Pudor a testosterona

Qui me conoix u qui lei iste blog, que cuasi ya ye lo mesmo, sabe que he teniu arrienda treballos, toz bien esferens. En beluns no yera que l’unico treballador y en atros treballaba de conchunta con asabelo de chen. Como se suposa que soi tecnico electronico, tanto en os mios estudeos como cuan he treballau d’ixo, gosa pasar que no i somos que ombres. En ixos casos a ormino se fa en poquez diyas ixa mena de morfuga de masclos que tanto pude a testosterona.

Soi umano, ombre y eterosecsual, asinas que de cabo ta cuan me fa goyo de charrar sobre como ye de polida Fulanica u Menganica. “Um, ye pien pincha ixa moza!” y au!. Se contina treballando u galbaniando, lo que pertoque. U charrando de cualsiquier atra cosa. Manimenos en istos treballos de masclos, as mullers son asoben l’unico afer que se’n charra. Contra más se’n charra, antimás, más aparixen custions masclistas, omofobas, razistas y asinas asinas, tornando-se en una “espiral enta abaixo” (downward spiral) que nunca no plega en garra cabo buen. Mesmo por o camín de cabo ta cuan aparixen os toros, o futbol y España. Ixa morfuga me fa asabelo de fastio. Un compañer mío siempre me fa remerar una eszena d’Idiocrazia. Qui no la aiga bista, que la baixe de l’Emule, la beiga y torne a leyer l’articlo. Ye ixa eszena an que Frito ha d’ir t’os campos a grabar os chitos ta salbar a bida d’o prota. Por o camín troban un puticlub, xublidan de raso o que eban de fer y bi dentran a buquir un ratet. Soi combenziu que o mozo que tos ne charro fería esactamen ixo, pos as suyas neuronas son de tot incapables de fer-se serbir ta cualsiquier atra cosa. Bueno, no. Tamién chita escupitos ta tierra terne que terne, cosa que tamién m’amuela asabelo.
En un d’os treballos pasó que, en una semana, s’enampló a chen que i treballabanos y prenzipiemos a tener bellas zagalotas por a "base". Os matutans d’os compañers míos continaban estando tan fatos como en yeran antismas, pero a lo menos no tartiban u lo deziban a escuchetas. Como yo tampoco no les seguiba lo chuego d’antis, con yo nian a escuchetas. Y jibo si alenté de tranquilet! Por un regular, en toz os treballos an que bi ha a lo menos una muller, as cosas cambean asabelo, asinas que m’estimo muitismo de treballar con mullers. No porque sían millors ni piors que no os ombres sino porque son cuasi a unica traza d’acotolar de camín ixa pudor a testosterona que tantismo fastio me fa...

domingo, 22 de febrero de 2009

Cultura, tecnolochía y atros. MdaS 012

Treballaré. En un puesto majo y an que no me dixaré os güellos debán d’un monitor, mientres me foto güeito oras con a baba cayendo y o zelebro amortau. Prou que ta yo ixo ye o millor d’a semana. Trobar treballo en istos tiempos ye bien difizil. Pero trobar-ne uno que te faiga goyo, con un orario bueno, no guaire luen de casa y que i ripesten os festibos... Ixo ye cuasi un siñal de que FSM esiste!!! Asinas que, agora, con más tranquilidat y más tiempo, podré –aspero- actualizar más a soben iste blog, buestro y de yo, que tanto goyo me fa y tan poco puedo cudiar...

The pirate bay: Ye o nombre d’un puesto web an que fazilitan l’intercambio d’informazión y cultura. Prou que ixo no fa goyo a os de siempre. En iste caso no son os $GA€s, que o suyo largo brazo encara no pasa os Pirineus. Son as productoras audiobisuals as carrañadas. Como antimás istos de TPB son bien farutes, se bei que s’adedicaban entre atrás cosas a publicar as cartas d’as discograficas y as ripuestas d’els ta redir-se-ne. Agora les son chuzgando por fer más fazil que a chen pueda compartir o conoiximiento. A notizia me parix sobrebuena, pues me pienso que ye imposible que les condenen y asinas a industria audiobisual tornará a fer o fato y feremos unatro trango entabán en a esfensa d’a unibersalidat d’a cultura. Si Guttemberg imbentase güe a imprenta, a colla de boques capitalistas ixa l’encorrería de camín. Aquí tenez os binclos -
uno y dos- t’as notizias publicadas en Publico.

Cargadors unibersals: Bi ha muitas cosas que ta toz parixen de sentiu común, pero t’atros no. O capitalismo, de sentiu común, no ba sobrau. De feito, le’n manca asabelo. Asinas que dan como una bueniza notizia a de que, dende 2012, toz os cargadors de mobil serán iguals. Lo que a toz nos parixeba lochico, istos siñors han tardau bels bente años en parar-ne cuenta. Con tot y con ixo, cal zelebrar ista notizia. D’una man por a comodidat y por poder abentar o calaixo rebutien d’os cargadors d’os mobils antigos. D’atra man por que ixo suposará un poquet d’aliento t’o meyo ambién, en fer-se menos cargadors. O estandar que diz que ban a fer serbir ye, como no, o micro-USB, que ya fan serbir muitos modelos de mobil. Por exemplo l’Alcatel C701 que ye o que tiengo yo. Ye ixa una d’as cosas que más goyo me fa d’iste mobil, pues si caziegas o cargador con mercar un cable USB y tener amán un puerto ya puez cargar-lo. En iste mundo de güe, conoixez bel puesto an que no bi aiga un puerto USB en 100 metros arredol? (Un urbanita dixit).

Carnet Choben: Se feban bente años dende que se prenzipió a fer serbir o Carnet Choben. Una buena ideya que muitos emos feito serbir, más que más ta mercar bel libro u ir t’o zine. Dezidión de zelebrar-lo fendo un conzierto. Y qué conzierto! 3monos, Juako Malavirgen, Azero, Jah'sta y Los Gandules. Buenismo. Tan bueno estió o conzierto como mala a organizazión. Cuan i fuemos bi eba arrienda zagals fendo botellada en a puerta, que ixo ye normal. Tamién me parix bien que dixasen dentrar bebida en a Multiusos u a lo menos que se mirasen enta atro cabo. Pero lo que no entiendo ye que dixasen dentrar-ie beires. Biyemos un buen fascal de litronas de Ambar y con toda a colla de adoleszens, muitos d’els bien fatos, que bi eba, podese aber pasau cualsiquier cosa. T’os mosicos y t’o publico. No estando prou ixo, malas que o conziero remató, a ixo d’a una, trancón os escusaus cuan encara se podeba sentir as zaguers notas d’a zaguer canta de Los Gandules. O que pretendeban con ixo no lo sé. O que conisguión sí. Un trapazil de chobens bien carrañaus y con muita razón y que os arredols d’a Multiusos pudisen a pichaus mientres una semana a lo menos. De seguras que a l’atro’l diya bi abió bien de chen que dizió que os chobens somos/son una colla puercos. 10 t’os mosicos. 0 t’o carné choben. Abaixo tenez un bideo de Jah’sta, por si no lo ebaz bisto u si nian los conoixez.

Belloch: Guarda si ye penible lo de Escrivá de Balaguer que mesmo en España paran cuenta d’a notizia ta fer-se a mofla de nusatros. En iste binclo t’o blog d’A Enrestida, podez biyer a biñeta que fazió Fontdevilla en Publico.




lunes, 16 de febrero de 2009

Teruel ye bien pincho. MdaS 011

Estar esqueferau y aqueferau de bez ye cada begada más cutiano en ista bida mía, asinas que en ista semana tasamen he puesto leyer bella coseta que no sían os zaguers cambios d’o mio prochecto de cabo de carrera y o libro que tiengo ta leyer en o bus. Asinas que o millor d’a semana se quedará en un par de fotos d’o cabo de semana y poco más.

Amantes: As fotos d’o cabo de semana las he preso en Teruel, en a fiesta d’os amantes t’an que i soi iu como toz os años dende en fa ya seis. Estiaño cal dezir que de buens conziertos, no bi’n ha abiu tantos ni tan buenos como atros años. Con tot y con ixo, o sabado de nueis ascuitemos una colleta que, encara que en primeras parixeba una mica aburrida, a la fin nos fazió pasar un ratet sobrebueno. As fotos son la una d’a Torre de San Salbador. L’atra d’un puesto de birolla que bi eba (no apto ta bechetarians).

Belloch: En estar en Teruel no podié ir t’a manifestazión en contra d’as barquichotas de Belloch, pero asperemos que istas zaguers fateras que ye fendo faigan rebellar a la chen. Aquí podez leyer a notizia en El Periodico. En Soitu he trobau un articlo asabelo de somarda sobre Belloch feito por Purnas. Asinas tot chunto parix mesmo pior alcalde, y guarda si’n ye de difizil...


lunes, 9 de febrero de 2009

Nazionalismo banal en Telecinco

Cuan se ye sondormiu, cuasi no t'enteras de cosa. Pero con tot y con ixo, en prenzipiar a sentir o bideo de Telecinco sobre a ipotetica "guerra lingüistica" de Galizia, me rebellé de camín y dezidié de mirar-lo por o rete pues me parixió exemplar. Exemplar, porque ye tot un exemplo de manipoliazión. Si yo tenese a mesma profesionalidat que ixos periodistas no ese rematau encara a FP.
A notizia ye a d'a manifestazión en contra / a fabor d'o bilingüismo. Qui ye de berdat a fabor y en contra de cada cosa pende de qui faiga a notizia pero rai. A traza que ha teniu Telecinco de ¿informar?, antimás de manipoliazión, tamién ye exemplo de nazionalismo banal. O bideo lo podez biyer abaixo. Bi ha frases gloriosas. "unos gritaban libertad", "encapuchados tiraban piedras". Tanimientres en o bideo no i aparix garra encapuchau. Nomás uno con un casco de moto que, por a cantidat d'ostias que foten un poquet dimpués, l'abrá feito buena onra.


"La policía tuvo que emplearse a fondo". Pobrichons. Se biyón obligaus de tot. No podeban fer atra cosa. Y plega l'Inte con mayuscla. Cuan fa serbir a parola machica que chustifica tot. "Los violentos". Ala. Prou. Ya son malos. Ya son terroristas y podemos abatanar-les. Podemos ilegalizar-les y criminalizar-los tot lo que queramos que son biolentos. Como ba dengún, por barrenau que siga, a refirmar a os biolentos?... Dimpués parolas de Anxo Quintana y d'a portaboz de Galicia bilingüe que be d'estar cualcosa parellana a los NHC d'aquí. Parix que no somos l'unico país con fatos... Como diz Anxo, dezir que o castellano ye en periglo en Galizia -u en cualsiquier atro puesto d'o mundo, i adibo yo- ye una barbaridat y una mentira.


A os organizadors d'a contramanifestazión no les fan entrebista. Total ta qué si son biolentos. Telecinco ya sabe muito de os biolentos antisistema y si no remeraz aquel atro bideo... Iste ye curtet que nomás ye un minuto y poco.




domingo, 8 de febrero de 2009

Groma, groma! (Yayo bolador dixit) MdaS 010

Con a resaca –metaforica y reyal- d’o conzierto por Castanesa, escribo güe. Buena chen, que se deziba, y bien buena, he d’adibir. Un conziertazo o que fazión ayer a chen de Frutas y Verduras, Mallacán, Comando Cucaracha y toda la crica de raperos que i estión. L’inte “Isla Aneto” como siempre, nos metió os pels punchudos. Ixas gaitas, en son d’emozionans! Antiparti d’o conzierto, y como ye de dar, se i metión mesas informatibas de bels colectibos. A triga estió curioseta. Bi yeran os Enrestidos, Greenpeace, A republica independien de Torrero, Caracol Zaragoza, La Pantera Rossa, as chens de Sieso y muitos atros que en iste inte de perder neuronas no puedo remerar guaire bien. Parix que por isto d’as montañas nos mobemos chen de toda mena y no nomás os cuatro aragonesistas de siempre, cremaus como tozas d’ibierno. He sentiu que mesmo se quedó chen sin poder dentrar-ie, asinas que en Castanesa abrán replegau buena cosa de perras, que menister ye. Prou que o conzierto ye o millor d’a semana, pero tamién han pasau atrás cosetas.

- Wyoming. Que tien as cosas suyas... Con tot y con ixo me parix simpatico y ye de dar que ye un sobrebueno showman. A suya carrera ye plena de programas sobrebuenos como “El peor programa de la semana” u o primer CQC. Agora, rodiau d’un equipo que bien querrían muitos –Usun Yun y Beatriz Montañez me parixen de lo millor que tien La Sexta- le’n ha colau a Intereconomía TV. Que ye de muito bien biyer, cal dezir. Yo, que soi d’os que de cabo ta cuan nos desayunamos con Federico t’arreguir-nos-ne, tamién goso biyer-la asobén. A istoria cuento que la conoixerez pos se’n ha charrau muito. Aparixió un bideo an que Wyoming carrañaba de mui malas trazas a una becaria. Ixe bideo, amás de penchar-se en Youtube, como no, estió emitiu ascape por Intereconomía TV, que yeran encantaus d’aber-se conoixiu. Pero be-te-me que a l’atro’l diya aparixió Wyoming contrimostrando que tot yera mentira, que les eban presto a trampa y bi eban caito. Tot, incluyiu a rispuesta d’Intereconomía lo pencho abaixo. Wyoming, unatra bez s’ha superau y ha dixau a Intereconomía como lo que ye. En o programa no sabeban nian que dezir. Dimpués de dar-se tanta bamba... M’ese feito firme goyo biyer por un foradet a lo barrenau ixe cuan s’enteró de que le’n eban colau. Continaz asinas, Wyoming y La Sexta que iz en una buena endrezera...

- Galactica. SLQH, El Intermedio, Los Simpsons y House son d’as pocas cosas que contino biyendo en a TB. Me pienso que a tamás, u talmén por culpa de, tantas canals, a TB ye cada diya pior. Antena 3 contina abatanando as buenas series que tien. 24 u numbers no duran ni dos capitols en o mesmo diya d’emisión ni a la mesma ora. Telecinco pude masiau a reality y alparzeyos. TVE ye TVE. Dengún no en aspera cosa. Asinas que, en estar un fricazo y o feito de que son repetindo a primer puenda de Los Simpsons, he abiu de mirar por internet bella cosa que biyer de meyodiyas mientres chento. En http://www.seriesyonkis.com/ podez trobar cuasi tot lo que podaz prexinar. Yo tos recomiendo de biyer The Big Bang Theory que ye una sitcom sobre una parella de fisicos que comparten piso. Antimás he prenzipiau a biyer atrás dos series que, por agora, me son fendo asabelo de goyo y que as dos son remakes de series de antimas. La una ye Doctor Who que ye bien curiosa. L’atra Battlestar Galactica. D’ista nomás en he bisto lo piloto, pero ya soi deseyando d’empapuzar-me. L’argumento ye clasico. Robots carrañaus con los umanos que quieren acotolar-nos. Con tot y con ixo ye feita de una traza muito orichinal. Biyez o piloto y ya me contarez que tos parix.

- En o planeta Aragón tanimientres, os soberanistas continamos estando notizia. Federico I nos fazió famosos –Grazias Fede!- y mesmo o BOA charra de nusatros. En reportache a toda pachina! Talmén siamos más importans que no creyemos? A berdat ye que, me pienso que china chana, imos enfortindo un mobimiento sozial y politico que puede plegar en bel puesto dillá d’a Madalena. Encara que por agora aigamos de remanir-ie y continar treballando a moniquet. En o blog de Aragonando podez leyer l’articlo.

- Darwin. Por Desde Banarús, atro compañer blogger m’enteré d’as chornadas que fan en Bilbo sobre Darwin. Asperemos que se pare bella cosa parellana en Zaragoza. En os USA, que ixo sí que ye Tierra de Barrenaus, os creazionistas chuntan asabelo perras y chen, mesmo ta creyar institutos de ¿imbestigazión?. No sé guaire bien si redir-me, plorar u tremolar con lo que mete en iste articlo de Publico. Que istos son os nuestros emperadors, cal remerar (os españols no son que os encargaus, cal remerar-lo).Entre que paran y no as chornadas sobre Darwin tos pencho contino os bideos d’a groma de Wyoming. Que baiga bueno!



lunes, 2 de febrero de 2009

Atchua! MdaS 009

En estar malaudo dende a bispra de San Baler, no he puesto escribir guaire, ni fer garra atra cosa. Con tot y con ixo, y encara que una mica tardi, tos dixo con lo millor d'a semana:

PP antitaurino?: Que no!, pero qui iba a pensar que nunca lo PP creticaría a lo conzello por bosar con diners de toz a tortura taurina. Pues be-te-me que lo fazió fa un par de semanetas. Prou que no por o feito d’estar una tortura sino por os diners, malfurriaus en combidar a conzellers a una corrida y en publizidat. Nueu mil euros. Lo que podría fer cualsiquier asoziazión cultural (cultural de berdat, ye de dar) con ixo... Encara que la notizia ye una mica biella la pencho, ta que tos n’esmeliquez.

Luengas: Tanimientres belún que s’adedica a esfender a cultura de berdat, ha feito una pachina web con un clamamiento –unatro- ta que se faiga a lei de luengas que tanto le cal a iste país. No sé exactamen qui lo ye empentando pero ye tenendo prou d’éxito. En tasamen una semana ya ha replegau más de mil firmas. Asinas que pasaz-toz, si no lo ez feito ya por
http://www.leydelenguas.com/, leyez o manifiesto y firmaz.
De seguras que isto ferá carrañar-se a los d’a plataforma NHC y a muitos “periodistas” y saputazes que biyen como continamos sin reblar en a esfensa d’as luengas d’Aragón que, por muito que les pene, son l’aragonés y o catalán. En iste país de 1.2000.000 filologos de cabo ta cuan cal un analís tan bueno y de bez somarda como
iste que fazió Chorche en Purnas.

$GA€: Continando con a chen penible d’a semana,
$GA€ contina perdendo chuizios. Ista begada contra CNT, que me fa mesmo más goyo. Un chuez ha declarau que podemos clamar-les “espluga de ladrons”. Asinas que m’imple de goyo y satifaczión chilar: $GA€ YE UNA ESPLUGA DE LADRONS!!!. Antimás en a sentenzia diz, con toda razón, que ye un sentir cheneral d’a soziedat. No creyeba yo que ise a estar tan d’alcuerdo bella begada con un chuez... Felizidaz t’a CNT y que tos faigan buen prebo los 9000 euros que tos ez ganau.

CHA: No comments a
la notizia que leyié, d’atra man que yera d’asperar. Penica de país...

Conflux: Ta rematar con bel poquet d’enfuelgo, dezir que podié estar, a tamás d’o enmorgau que encara yera, en a debantadera de Conflux. A coleczión me parix muito buena, con comuns y infrecuens de buen chugar y con raras que ascape trobarán puesto en muitos mazos. Lo listau tos lo podez baixar en iste binclo de Magic Madrid. Antimás he trobau una pachina an que bi ha un fascal de mazos ganadors y l’interfaz que i fan serbir ye bien bueno, pues en pasar o churi por debán d’o nombre d’a carta, a un costau aparix o debuxo d’a carta. De millor fer serbir que os listaus de Rebellion u d'atras webs.

... Y o sabado remeraz o conzierto que, por si bel espisguardau no lo sabe encara, tamién i tañerá Amaral. Tuet!!!!