miércoles, 26 de septiembre de 2007

Trobada Bloggers

Parix que a la fin sí que nos trobaremos. O biernes puestar que se de un buen trango entabán en isto d'a multimedia aragonesofablan, y asperemos que siga o primer d'una endrezera mesmo más gran. U, a lo menos, feremos buena charradeta y bella biera. O puesto trigau ye o bar "La Gramola" en a carrera Concepción Arenal de Zaragoza y astí plegaremos a las güeito ta fer serbir a luenga nuestra. Igual como atros no podré quedar-me-ie guaire pero, como he dito en prenzipiar, aspero que iste no siga que o primer trango. China chana, ban adibindo-se más y más blogs a iste mundet y cada begada se fan cosas más intresans. Una d'as zagueras que he conoxiu, grazias a O Chemeco d'as Parolas, ye Fendo huellos, un blog adedicau a la naturaleza bien intresán. Biemplegau y aspero que nos beigamos tamién en a Trobada!
Y no puedo rematar sin agradixer a Mensachero que aiga preso a iniziatiba de chuntar-nos: Muitas grazias, mozet! Nos beyemos o Biernes!

martes, 25 de septiembre de 2007

Tortura en a TB

Güe fa A Primera (TVE 1) a debantadera d’una nueba serie de TB de produzión espanjola, cañí y olé. Herederos (Ereus) se diz, y ye a istoria d’una familia de ganaders y toreros. Dimpués de “Periodistas” u “Polizias” y tantismas series de medicos y atros gremios ya caleba una serie asinas, que charre de bel tema tan intresan como os toros y a suya tortura. Plega ista serie en un inte an que parixe que bi ha más oposizión que no nunca a la tortura taurina y en momentos de plegar o diya mundial antitaurino (En Zaragoza se ferá o 7 d’Otubre. O cartel ye o de l’año pasau). Y de protagonista han preso a una choben estrela que se diz Concha Velasco.

Deziba l’atro diya en bel periodico Lucía Etxeberría que seguntes os presupuestos de l’Estau cada persona baxo almenistrazión española bosa con os impuestos suyos 47 euros que ban dreitamen ta torturar toros, sin contar con as ganaderías que nomás s’adediquen a ixo. Feba tamién un clamamiento ta la ochezión fiscal con ixa enchaquia, pero ixo ye un tema que da ta muito más y que talmén en fable más entabán. O caso ye que, si no estase prou adedicar ixos 47 euros / persona, agora se malfurrian os diners publicos en fer una serie sobre os toros. Puestar que o PSOE, como ye agora fendo bistera a suya españolidat, que muitos no tenebanos mica duda, aiga pensau que ista ye una buena traza de fer-lo.Asperemos que isto dure menos que a cosa aquella de Escuela d’actors que fazió Antena 3. Deziba Lucía en o mesmo articlo que, seguntes una encuesta a o 71,2 % d’a poblazión baxo almenistrazión española no l’intresaba mica a tortura taurina. Asperemos que tampoco no les intrese una serie sobre ixo.

Expo, PSOE, polis y l’aragonés

Beyendo Aragón TB, me dizen que bi ha dos nuebas notizias sobre a Expo 2008. “De seguras que ye buena cosa”, me pienso somardón. A primera diz que ban a trayer quemisió cuantos mil polizias nuebos ta beilar por a nuestra seguranza. U yera por a seguranza d’a Expo? Ixo no m’ha quedau guaire platero… Ye lochico que si, como se suposa que pasará, Zaragoza acubillará en ixos diyas a millons (u más) de personas, bi aiga más polizía ta os posibles, probables y cuasi seguros, problemas que tendremos de trafico y d’atras cosetas pero, se ferán serbir ta ixo u ta prebar que no bi aiga garra boz en contra d’a Expo y que si bi’n ha se silenzie antis con antis? Ya emos bisto qué pasó en Sebilla u Barzelona en ebentos parellanos y sabemos qué fan con os coleutibos sozials. De todas trazas a polizia ya ye “apatrullando” toz os bicos cusirando que dengún no se mueba guaire (u mica).


Ista yera alto u baxo d’asperar, asinas que continé beyendo a TB por si deziban belatra cosa más curioseta. Y jibo si en dizión! L’asambleya de “majaras” ha dezidiu de creyar una comisión de “castellano urchen” (u bel nombre parellano) ta cusirar (unatra begada cusirando) que o castellano emplegau en as publicazions d’a Expo no siga malo. Buen castellano en Aragón. O millor, si cal. Y Aragón S.L. contina sin que meta “augua” en a caseta d’a plaza Espiña, Flufi contina dezindo-se Flufi y no Chisla, como botó (bosando, caldría remerar) a chen, contina sin aber garra notizia sobre si l’aragonés tendrá bella mena de presenzia en a Expo encara que nomás siga que en a caseta d’Aragón….



Y de rematadera, prebablemen por o cambio de gubierno en o conzello a Ofizina d’Emanzipazión Choben a tornau a clamar-se Oficina de Emancipación Joven y han cambiau lo cartel que se beyeba dende difuera d’a Casa d’os Morlanes. Y con ixe cartel tamién ha disaparexiu o doble nombre d’a Fuella d’o Boluntariato que torna a estar nomás que en castellano. D’o Zentro d’Amprens encara no sé cosa, porque no i soi iu, pero cuento que poquez diyas le quedarán con ixe nombre si encara i remane. Chiquez conquistas que s’eban conseguiu sin garra problema dende a soziedat ni a chobentut t’a que iban endrezadas, abentadas por bella pocoesmo d’o PSOE. L’aragonés continará estando imbisible, encletau en o Pirineu, en as asoziazions y en bels puestos d’a Madalena. Caldrá fer bella reflesión, u qué?

jueves, 20 de septiembre de 2007

Conziertos sí, pero de la Ronda

Como toz os años ta istas calendatas, gosan aparixer en a TB ixos documentos graficos fruito d’a galbana estibera y de la manca d’orichinalidat que amostran os menadors de contenius d’as TB’s. Uno d’els y d’os mios preferius ye ixe que fan sobre lo caro que ye lebar a un nino t’a escuela. En ye por a manca d’analís y os xublius, intenzionaus u no, d’os charraires que’n parlan. Diz que l’amostranza d’un nino bale X si ba ta escuela publica, muitismas X si ba ta la pribada y, aquí bien lo millor, 3X u 4X si ba ta la conzertada. Y rematan o programa dizindo que “ai mama que cara ye la bida”, “cuantismo pesan os libros de güe”, “como ploran os ninos cuan marchan ta clase” y asinas asinas. Dengún charra d’o fundo de tot ixo. Alabez en charraré yo.

Se suposa que a escuela conzertada ye ta emplir os foraus t’an que no plega a publica. Ye una mida que se prenió en a transizión cuan cuasi no bi eba escuelas publicas y caleba lebar t’as clases a milenta ninos. En cuentas de fer más zentros publicos as diferens almenistrazions estatals y autonomicas s’han acoflau en ixa situazión. Os zentros pribaus conzertaus, catolicos en a suya más gran parti, que ya teneban ambute poder antis d’a muerte de Franco, s’acarrazan a la popa de l’Estau como un mixín a un churi que plega de cazar. Y, de rematadera, aparixen asoziazions de pais (y mais) catolicos, asabelo carrañaus abanderando un siñal de “libertat de triga de zentro”.

L’espiritu d’a conzertazión se suposaba temporal dica que as almenistrazions podesen atender toda a demanda educatiba. Tamién se suposaba (y se suposa) que un zentro conzertau ye lo mesmo que uno publico cambiando nomás a chestión interna d’o mesmo y que TOZ abrían de poder eslexir publico u conzertau pendendo nomás en si ye amán de casa u d’o treballo, si tien u no bel puesto an que o mozet u mozeta pueda chentar y atras custions asinas. Pero, be-te-me, que os conzertaus son asabelo más caros que no os publicos. Reconoxiu. Amostrau, toz os años, en as portaladas d’os periodicos, en as TB’s y radios de cuchas, dreitas y “ni ta tu ni ta yo”.

Si parix que ye caro lebar a un nino ta una escuela publica (remeremos: X euros) ta una familia “normal”, en será más lebar-lo ta una conzertada? U no? Alabez, ya tenemos toda una napa d’a soziedat difuera d’a conzertada. Qui no puet bosar-la no i dentra y prau!. Pero bi ha familias que con tot y con ixo, fan firme poder economico y preban de lebar-les-ie. Y se troban con milenta dificultaz d’o zentro y d’a resta d’os pais. Más que más si no yes blanco, español, eterosecsual y catolico.

Como puet un zentro conzertau estar más caro que no uno pribau, si tot ye controlau por l’almenistrazión? A iste sistema le claman de muitas trazas: uniformes carismos, APA’s con autibidaz estraescolar obligatorias (y bien caras)...

Y agora, ixos pais que no dixan que buena parti d’a poblazión pueda dentrar en os zentros conzertaus que tamién son pagando con os impuestos suyos, nos fablan de libertat de triga de zentro. Iz-tos-ne a muyir fardachos!

Como istas cosas fan que me bulla a sangre y m’encarraño asabelo, tos dixo con un bideo d’una diputada d’o PSOE capina como un canasto charrando de Eva Almunia y a suya graniza chestión. Eva Almunia, ta qui no lo sepa ye consellera d’Amostranza d’Aragón y tien bel cargo aintro d’o PSOE estatal. Y, con o permiso de Biel, ye d’o pior que emos teniu en iste país.

Más combocatorias


Con Setiembre plegan os buenos deseyos cara t’o curso. Prenzipiamos l’año lectibo con rasmia y empentando proyeutos de toda mena, beluns bien pinchos. Dende Nogara ufren un curso d’aragonés a distanzia que se ferá por o rete. Ya no tenez mica sincusa de orarios u de bibir luen de Zaragoza, ya podez aprender aragonés bibaz an que bibaz y treballez as oras que treballez.


Tamién se ye parando una trobada de fabloggers ta la fin de Setiembre. Encara no ye guaire platero an se ferá pero ya caleba bella cosa asinas. Que nos beigamos y charremos d’o nuestro “treballo” y, más que más, que nos conoxcamos y faigamos, prou que sí, unas bieretas.

En iste berano no he puesto escribir guaire en o blog, como ye de dar, y no he charrau d’atras cosetas que s’han feito, como o II Carrasca Rock en Exulbe que, por lo que sé, estió muito bien. Podez trobar una cronica en Labrándonos en la sombra.

Dende o Zentro Aragonés de Barzelona, os aragoneses que i biben han presto una chornada de Cultura y, más que más, mosica aragonesa. Podez beyer o cartel penchau en iste mesmo afer. Tos dixo con o bideo d'a trobada de fabloggers.

lunes, 10 de septiembre de 2007

Civil War

L’ebento Marvel de l’año, le dizen a Civil War, un macrocrossover que ye fendo a Casa d’as ideyas an que partizipan todas as colezions y supereroes. Dende os mutantes dica os nuebos bengadors, pasando por os nuebo guerreros y personaches de segunda ringlera cuasi ixuplidaus que feba arrienda años que no se’n sabeba cosa.

Lo intresan d’ista saga no ye a partizipazión de tantisma chen ni a cantidat de titols y comics relazionaus. Bi ha abiu sagas como ixa en toda a istoria Marvel como Inferno u A Era d’Apocalipsis. Lo nuebo y intresan de ista ye o conteniu pulitico que acubilla en as paxinas suyas. A istoria prenzipia con os Nuebos Guerreros embrecaus en bella mena de reality de supereroes a lo “Cops”. Han de pillar a unos superbillanos y un d’els tien o poder de fer esclatar partisd’o suyo cuerpo. Cuan cuasi lo han conseguiu o mozet iste esclata enronando tot un bico y matando a milenta chen, muitos d’els ninos d’una escuela amanada. Tot isto debán d’as camaras de telebisión, fendo tremolar a os medranosos yankees.

Dende allora o presiden, empentau por a presión sozial, os seutor más conserbadors y SHIELD (bella mena de CIA de l’uniberso Marvel) empenta una lei que obliga a toz os supereroes a rechistrar-se y treballar t’o gubierno. Istos se trestallan en dos bandos: la uno a fabor d’a lei y la otro en contra. A la fin, y fueras d’as barallas entre os dos bandos d’o que charra a sagaye d’una d’as rufiertas más importans d’o sieglo XXI: acombibenzia y as mugas entre os dreitos indibiduals y os coleutibos. Tamién charra d’atros afers como o control sobre os meyos de comunicazión. Bi ha mutisimos paralelismos con o mundo d’agora. Os supereroes son engarcholaus en un limbo chudizial (igual como Guantanamo) sin garra dreito, toda a chen con disbraz ye sospeitosa y asinas asinas...

En atras custions menos filosoficas, o guión y os debuxos, más que más os d’a serie prenzipal, son buenizos de tot. Tos recomiendo que la leigaz si podez.

Lorwyn

Cada diya manca menos ta la prerelease de Lorwyn y ban conoxendo-se más cosetas. Fa bels diyas WotC esplicó cual yera o nuebo tipo de carta y os regles suyos. No goso creticar guaire a Wizards pero creigo que iste nuebo cambeo no ferá guaire onra t’o chuego. Embolica masiau os regles, más que más, ta os chugadors con poca esperienzia y o poder d’os nuebos “peteniadors de planos” (traduzión propia) me parix masiau furo, estando cuasi obligatorio chugar-ne uno en toz os mazos. Talmén (y sisquiá) m’entiboque, pero estoi que denguno d’istos nuebos personaches baxará d’os 15 euros. La resta d’o que se conoix son, dende a mia ambiesta sobrebuenas cartas (belunas comunes). En Rebellion y MagicMadrid como siempre tenez spoilers parzials que ban esbiellando-se cuasi de contino asinas que podez dentrar-ie ta ir conoxendo as nobedaz y os regles d’os peteniadors (que antimás ferán más chonflo a l’amigo d’os ninos Tarmogoyf).

Sobre tot l’empandullo d’os dos minibloques que fan un bloque pero no, tos combido a leyer o zaguer numer de Serra an que bi ha un articlo a fabor y unatro en contra. A yo rai. Nos iban a quitar os diners d’una traza u de belatra. Millor isto que no Coldsnap, no?




Tos dixo con o bideo promozional de Lorwyn. A prerelease de Zaragoza se ferá en Freakland o 30 de Setiembre a las diez d'o maitín. Nos i beyemos!