jueves, 1 de diciembre de 2016

D'un cascuello d'aguacate (I)

De chiquet, creixeba en una Zaragoza que, encara que m'encantaba, no deixaba d'estar una ciudat. L'entorno urbano yera tot lo que conoixeba y, quan a la fin salié t'a montanya, me quedé sin sangre en a pocha. Estió un verano, en una visita ta casa d'a mia prima, que viviba en un lugarón d'o Pirineu navarro. Tot i yera verde. Chunto a lo lugar, baixaba un arrigachuelo con un chiquet churro, que a yo se me feba os d'o Niagara. A os costaus d'o riu, arrienda chopos cusiraban que no s'esvarrase d'o camin que por sieglos heba feito. Aquells arbols, fuertes y alteros, me recontaban historias d'a val, d'o riu, d'as vacas que i bebeban, d'os habitants d'o lugaron d'a mia prima.  No i pasé que un dia, pero me deixó marcau pa cutio.

A vida me levó a continar vivindo en Zaragoza, en tot lo centro, en una casa chiqueta. Garra posibilidat de tener un chardín. No digamos ya un bosquichón, que ye lo que en veras me fería goyo. Me he d'aconhortar con quatre macetas que tiengo en as balconadas que dan t'a carrera. Tasament un metro quadrau que me conecta con a tierra ixe poquet que nos cal a todas.

Un dia, de cocinicas, yera fendo guacamole. En acabar-lo, guardé un d'os cascuellos pa ficar-lo en o pote d'o verde y espeso unto. Diz que priva de que se malmeta. No sé si ye verdat u no pas, pero como no cuesta mica de fer-lo, siempre lo i fico. L'atro, que por un regular lo aviento, decidié de plantar-lo. Teneba una d'as macetas vuedas. La que más luz recibiba. Heba estau poblada por uns matullos de tremoncillo por bell anyo, pero ya s'heban muerto feba tiempo.

Lo fiqué bien en tierra, le adhibié una mica fiemo que me deixó un amigo que tien un hortal, y lo ruixié bien ruixiau. Cada dia, quan plegaba d'a faina, le feba una uellada, asperando que a la fin chitase. A primer semana, miau. A segunda, miau tamién. Quan ya prencipiaba a pensar que d'astí, no en creixería cosa, un chiquet chito acucutó por a tierra. Un tallo primo, rematau en una folleta diminuta. Quasi no yera cosa, pero me implió de alegría y ganas de continar con os cudiaus que le daba a l'aguacate mio.

D'aquell cascuello, a escape prencipió a medrar una planteta. Puyando con firme rasmia, l'aguacate tiraba entalto a palmo por semana si fa u no fa. Pasau un mes, ya teneba bella dotzena de fuellas. Verdas por un costau, blancas por l'atro. O tallo, poco más gordet que quan heba naixiu, ya pasaba lo barandau d'a balconada. ¿Y l'argüello mio? Ai, amigas! Ixo sí que yera alto. Como un mayo. Pasaba la balconada, lo teito, los quatre pisos d'alto de casa nuestra y plegaba en o cielo mesmo, fendo tranya entre os nyublos d'a primavera que yera prencipiando.

Con l'aguacate más bonico de tot lo barrio, a cada visita que pasaba por casa, prou que le'n amostraba. "Mira-te", les deciba, "isto, d'un cascuello que iba a aventar, como foi con totz." Les animaba a fer lo mesmo. "Planta-te-ne uno en casa. Ya viyerás que goyo. En ye d'agradeixiu!".

Dica que un dia, vinió a visitar-me lo mio amigo botanico. "Mira-te, mira-te", le deciba atarrantau entre que l'endrezaba ent'a balconada. "Vas a viyer que aguacate más pincho me ha medrau en a maceta".  L'amigo, fació un cenyo de sorpresa en viyer-lo, que yo interpreté como admiración enta l'aguacate tan repoliu que adornaba la carrera. "¿Pero que me dices? Isto no ye un aguacate. Isto ye un chopo". Fendo uellos de caparra, le expliqué que yera imposible, que i heba plantau un cascuello d'aguacate, y que d'asti heba surtiu aquella planta, altera y prima. "Ye un chopo", repetiba tozola l'amigo. "Treballo con ells. En he visto a boticiegas. Mesmo he publicau un par de treballos sobre as variedatz ibericas d'os chopos". Yo nunca no heba visto una planta d'aguacate. Ni un chopo tan chiquirrín. ¿Que iba a saber-ne?

Un borguil d'emocions me puyaba dende os budiellos. D'una man, acababa de descubrir que l'aguacate mio no yera un aguacate. Me heba teniu enganyau. A yo y a tot lo vecinamen, a qui les heba recontau, con tot detalle, como medraba la mia planta favorita. D'atra man, yera o feito de tener un chopo en casa mia. ¡Un chopo!. De bote y voleyo, tornoron t'a mia memoria, a val aquella de Navarra, con l'arrigachuelo, as vacas, o verdete y la montanya. Y os chopos. Os chopos que rodiaban lo riu y que, viachando por o tiempo y l'espacio, agora habitaban en a mia balconada.

Miguel, l'amigo botanico, viyendo que me yera fendo cruces, me charró d'os estudios d'o "chopo cruzau". Pareixe que en una universidat chaponesa, heban estau investigando lo potencial d'o chopo pa desenrollar-se en atras lagors. Sin que calese contacto fisico, ni sisquiera estar guaire cerca. Os estudiosos chaponeses  heban comprobau como de diferents simients, en un porcentache muit muit chiquet, en creixeba chopos. No sabeban explicar-lo guaire bien, pero a hipotesi más probable yera una mutación producida por a radiación electromagnetica, ya que se heba visto un chiquet aumento estadistico d'o "chopo de lagor extranya", como le clamaban, en entornos urbanos sometius a fuertes dosis d'istas radiacions.

Atra amiga me charró de atro estudio en un hortal ecolochico. En una plantación de tomates de Villamayor, heban plantau bell par de caballons de tomate canario. Y ixo heba creixiu, fueras d'una planta, de tomate d'una variedat local. Diz que bi ha teorías que dicen que a tierra tien memoria y que puet fer cambiar l'ADN de bellas simients pa adaptar-las a las necesidatz d'o puesto an que creixen.

No sé si a culpa la tenió lo router que teneba a o canto d'o balcón. U si a tierra d'a maceta quereba que salise un chopo, que en Aragón bi'n ha a bando, y no un forano y exotico aguacate. Sé que contino cudiando-lo como lo dia que planté o cascuello. Y que cada verano, quan salgo t'a balconada y m'acoflo en o puff a leyer o libro baixo a solana zaragozana, a radida uembra d'o mio chopet, me fa viachar ta l'arrigachuelo navarro. Y puedo ignorar os chilos, os rudios d'os autos, l'estrapalucio d'a ciudat y sentir como l'augua escorre, val t'abaixo, por aquell lugarón d'o Pirineu.

martes, 29 de noviembre de 2016

O vecin y o mercau. Complicidat falica vol. 2

Tornaba ta casa dende o mercau, con dos bolsas cargadas a caramullo. Me trobé un vecin d'o vico y, aduyar-me no, pero limpio capaciar.

A conversa prencipió asinas:
- Que t'ha mandau a muller a mercar u qué?
- No, que he veniu yo solico
- Hombre, pero te mandará a mercar
- No, voi quan cal y prou
- Cal obedeixer-las, que sino... Tu l'obedeixerás, no?
- Hombre, pues quan tien razón sí, y quan no, pues no.
- Pues seretz tot lo dia tricolotiando-tos
- No. Charramos prou. No tenemos grans problemas, a verdat.
O capazo dimpués continó sin guaire suco. Qué tal a familia, o treballo, y tot ixo. Pero me costó esvarrar-le d'a complicidat falica, concepto que expliqué fa tiempo y que hue nomás viengo a ixamplar y eixemplificar.

De nuevas, me trobo con ixa supuesta complicidat basada nomás en os nuestros atributos chenitals. Con ixa persona no tiengo guaire en común. Nos conoixemos a traviés de unatra persona, parient suya, y nunca no hemos teniu confianza. Simplament somos vecins. Pero o "colegueo", entre "tios-tios" se da por supuesto.

No, quiesto vecin, a mia parella no gosa de mandar-me a mercar. Quan cal bella cosa en casa, belun d'os dos baixa t'o mercau y lo merca. ¿En veras cal que a tuya parella te diga quan cal mercar y qué?

Quanto a lo de obedeixer, a escuchetes se podeba sentir o canso discurso de "le obedeixco encara que no tienga razón, simplament pa que no me chile, porque ya sabes como son as tias, que chilan asinas sin mica sentiu ni razón...". Pues no, no le doi la razón porque sí. Si discrepamos, se charra, se preba de plegar en un alcuerdo, y sino bi ha manera, en una solución que sigamos as dos d'alcuedo.

Tricolotiar-nos, prou que nos tricolotiamos. ¿Más u menos que qualsiquier atra parella? Pues no lo sé. As dos somos tozolicas, asinas que talment más. Pero as dos sabemos fer venir a plego a l'atra, asinas que talment menos.

No, a nuestra parella no ye ideyal. Pero quiero creyer que ye lochica. Que prebamos de fer as cosas normalment, y no como ixa cultura "machota" nos diz que cal fer-lo. Que somos dos adultas, capables de chestionar as suyas necesidatz y deseyos individuals y tamién as comunas.

Me niego a que lo mio chenero siga representau por un cliché d'una persona incapable de viyer qué cosas faltan en a fresquera y os almarios, que obedeix acriticament, u que lo fa porque no tien argumentos con que concarar-se. Soi con a mia parella porque quiero y porque la quiero, no porque a mia supervivencia penda d'ella u por resignación.Y me fa muita pena que ixo no siga lo cutiano entre as personas d'o chenero que dicen que i perteneixco.

viernes, 25 de noviembre de 2016

Tabiernas d'Aragón (IV): Pottoka

No recuerdo quan estió a primer vegada que vesité lo Pottoka. Tampoco no recuerdo la primer vegada en l'IFI. Pero sí que totz dos han feito parte d'a mia vida borinera. Y cómo! Ista semana plegaba lo momento que tanto espanto nos feba dende tiempo habe. Iñaki, amo y cambrero d'o Pottoka, se chubilaba. L'espanto veniba de que i montasen bell atro bar de modernas, d'ixos que surten como fongos por a Madalena, en zagueras. Bien se vale que, seguntes pareixe, lo deixa en buenas y expertas mans que no esvarrarán guaire o camín que prencipió Iñaki.

De bars clonicos, bi'n ha a brozuecos en Zaragoza. A mesma estructura y decoración, os mesmos menús, a mesma bebida, o mesmo ambient, ... De Pottokas, no bi'n heba que uno. Como deciba belun, en un d'os cientos de reflexions que han deixau istos dias en os retes socials, a carrera Martín Carrillo, ha deixau fa tiempo de decir-se asinas, y tot lo mundo la conoixe como "a carrera d'o Pottoka".

O Pottoka no yera un bar "de marcha", ni de fer-se un café, ni teneba pinchos, ni birolla. A mosica tasament se sentiba, o cambrero no yera especialment simpatico, no i feban cocktails de moda, ni yera más barato que qualsiquier atro bar d'a redolada. Manimenos, os cabos de semana s'empliba. Yera un bar d'ixos que siempre i ye. Un puesto an que se ye bien, an que te puetz posar y, arredol d'una botella de sidra vasca, apanyar totz os problemas d'Aragón y d'o mundo con as tuyas companyeras y amigas.

O Pottoka yera d'ixos bars periglosos, porque sabes como i dentras pero no quan ni como en sales. Un d'ixos bars an que as rondas y os capazos iban a l'arreu. Nos i trobabanos, antimás, chent de todas as familias politicas d'a madalena. Pocas vegadas he visto más compleganza que en as despedidas que le faciemos a Iñaki en istos zaguers dias antes d'a chubilación.

Me quedará incognitas pa cutio como qué ostias bi heba dezaga d'a puerta de l'escusau u qué sentiba Iñaki en o transistor. Agora una nueva etapa empecipia pa o Pottoka. A chent que lo pilla tien la confianza d'Iñaki y tamién la mia, y aspero que sepan conservar ixa esencia acullidera que teneba o bar dica o suyo zaguer dia. Aspero tamién que Iñaki tienga la chubilación que tanto se mereixe, en estar toda una figura d'o vico y d'a vida de muitas personas que hemos viviu tantas cosas en os suyos locals.

Iñaki, zure erretiroa gozatu!
Agur Pottoka, kaixo Pottoka!

Tos deixo penchadas as tres videofateras que i gravé:



 

jueves, 17 de noviembre de 2016

Un fanzine pa diez anyos de blog

A menos d'un mes de fer os diez anyos de Tierra de barrenaus, caleba pensar en bella celebración. De entre todas as opcions que teneba, que iban dende publicar un triste post, dica fer o tant asperau TdBFest (sentir Tierra de barrenaus radio 1x06), a la fin me decidié por fer un fanzine, que ye lo que lo peta.

O fanzine, que presiento iste sabado a las 12:00 en Treziclo (C / Liñán, 8, Zaragoza), ye una replega de bells articlos publicaus aquí. No sé si i son os millors, u los que más goyo fan, u os que más visitas han teniu. He prebau, ixo sí, de que estasen representativos d'o blog. I son quantas d'as mias basemias: l'aragonés, a relichión, a borina, ...tot recontau en aragonés. Pareixe metira que en 2016 calga continar con o discurso de que en aragonés, como en qualsiquier atra luenga, se puet charrar de tot. Pero ye asinas. Y como millor que decir-lo, ye fer-lo, aqui ye o testimonio de más de 700 entradas d'o blog sin haber charrau nunca de fainas agroganaderas, ni d'as cosas d'antes más. Que ye muit bien charrar-ne, pero lochicament, soi incapable de fer-lo.

O fanzine preba de cumplir qualques funcions. A primer, tener en soporte fisico una memoria d'istos diez anyos. Que no ye poco. Soi d'os que encara se fa copias en papel d'as fotos. Que nunca no se sabe quan puet petar internet! Segundo, ye financiar o programa de radio. No tien guaires gastos, pero cal pagar bella coseta, asinas que os diners d'o fanzine irán pa poder continar con o programa. A tercer función ye la de prebar de colar-me en as mesas de ferias y puestos chunto a atras obras en aragonés. Encara bi ha muita chent que no fa servir retz socials, u que no se navega guaire con internet. Aspero que o formato fisico le sirva a belun pa conoixer o blog. Tamién ye una traza, en ista primer presentación, y en os eventos que se vaigan fendo, de trobar-me con as lectoras. As que conoixco y as que no. De tener ixe feedback que tanto goyo me fa y, prou que sí, de capaciar un ratet.

Cal agradeixer, prou que sí, a toda la chent que tien a culpa de que o sabado pueda compartir con vusatras iste fanzine. A XCAR, de Malavida, que fació una portalada repincha, y a Juan Pablo que revisó los textos y con qui tanto aprendo cada dia. A toda la chent que bella vez me hetz leyiu y escrito, a qui sentitz o programa de radio, a qui viyetz os videos u as fotos, a las que interactuatz en os retes socials. A todas las que facioron tranya en isto de l'aragonés en internet, con as suyas webs y blogs. Y en a radio, prou que sí. A Arale, que me aguanta 24/7 ixas basemias, y que de cabo ta quan le toca d'opinar si qualcosa ye publicable u no pas. Y a toda la chent que me deixo, que no en serán pocas.

Asinas que convidadas sotz a compartir ixe ratet o sabado de maitins y a pillar-tos o fanzine pa tener ixa memoria d'istos diez anyos. Besichons, lectoras, que sotz as millors!




martes, 15 de noviembre de 2016

A cultura en a Marca Espanya (#MarcaEspanya 1)

"Muera la intelectualidat traidora". A frase de Millán Astray, tant quiesto por Esperanza Aguirre, la d'a Espanya d'os tresmil anyos, revela muito d'a relación entre Espanya, intelectualidat y cultura. A traición ye cosa mala  por definición. Pero qui define traición como qualsiquier cosa que s'esvarre un celemin d'a linia fixada por a hechemonía cultural, ixa intelectualidat traidora esdeviene simplament intelectualidat.

A cultura espanyola, vista dende l'exterior, se resume en toros y flamenco. Ni l'estau, ni qui se sienten nacionalment espanyols, se avergüenyan guaire d'iste feito. A tortura animal ye present en tot lo mundo de diferents trazas: cazeras de zorros, domas de bisonte, barallas de gallos, ... pero en pocos puestos se fa d'ixo sinyal nacional.

O mundo d'a cultura, la de verdat, la que no le cal torturar garra bicho, ye mirau con desconfianza y mesmo con hostilidat. L'espanyolismo s'ha ocupau de fer-les pareixer uns cazasubvencions galbans que fan mierda. O caso d'o cine ye muit sinyaler. No sé si hetz visto bella vez o programa que fan de cine espanyol en 13TV, pero ye buen reflexo d'a idea que tien Espanya d'o que ye a "intelectualidat no traidora". Willy Toledo, Leo Bassi, Albert Pla u a revista Mongolia son linchaus publicament y as suyas obras boicoteadas, u mesmo sufren prebatinas d'atentau. Os titiriteros de Madrit, todas as campanyas de criminalización d'a AVT contra Fermín Muguruza, S.A. y muitas más, a basemia d'a prensa de dreitas con a familia Bardem, ... de casos, n'i hai a brozuecos.

"Faltarán perras para otras cosas, pero aquí gastan un millón", cantaba Ixo Rai! charrando d'as vacas en as fiestas d'os lugars. Y quanta razón tienen. Con os diners que malfurria cada chiquet concello en fer-le a tana a las vacas, se podrían fer unos ciclos de teatro impresionants, u trayer orquestas que fuesen una mica dillá d'os Pajaritos y Paquito Chocolatero. Pero bi ha un ambient cheneralizau de que a minoria vaquillera tien bella mena de prioridat en o reparto de perras, y que lo atro ye pa "finas" u concieteras. A las mosicas y a las artistas en cheneral se les recatia tot lo que se puet, fendo-les bien dificil poder vivir d'o suyo treballo, tant malament reconoixiu.

A Marca Espanya se caracteriza tamién por una envista de tot utilitarista y economicista de quasi tot. Lo viyemos en o nuestro país quan s'estricalla a Espluca de Chaves pa poder cazar-ie, u s'esboldrega Averly pa fer-ie putos pisos. Pero dillá d'as nuestras mugas en tenemos eixemplos arrienda (el Cabanyal, Gamonal, El Algarrobico, ....) que metioron a especulación y o negocio inmobiliario por debant d'as valors patrimonials y mediambientals u d'as necesidatz d'o vecinamen.

Con ixa mesma mentalidat se desprecian y desprestichian os estudios "de letras", sacando-les horas de l'amostranza obligatoria, u mesmo zarrando estudios universitarios. Ixo sí, l'amostranza en castellano en Catalunya, u d'a relichión catolica en totz os puestos, eslampa d'ixa envista y se debuixa como un dreito quasidivino.

Quan bell artista trunfa difuera de l'Estau, ixo sí, no les falta tiempo t'apropiar-se d'o treballo suyo si cal. "El cómic español se quita los complejos con cuatro premios Eisner", titulaba La Razón quan Aja, Guarnido y Díaz Canales ganoron iste premio, que ye o máyor reconoiximiento en o mundo d'o comic. L'articlo s'adedica a charrar de Marca España y de que Espanya y a luenga espanyola son pistonudas y trunfan en tot lo mundo. Curiosament, en El Periodico, o titular yera unatro: "Dos creadores premiados con los Oscar del cómic reniegan de la Marca España". En ixe articlo, bien diferent de l'anterior, os dibuixants charran d'a imposibilidat de tener una carrera profesional y sisquiera reconoiximiento publico en Espanya, si t'adedicas a os comics. "Tanto ell [Juan Díaz Canales], como David Aja, atro d'os premiaus, han expresau a traviés d'os retes socials a suya carranya y han escrito que lo que les preboca Espanya ye, más que más, vergüenya", diz l'articlo. As parolas que diz contino Díaz Canales, expresan lo que cada vegada más artistas piensan:


Díaz Canales afirma que ye espanyol, porque "no puetz estar atra cosa dende o momento que naixes d'Espanya" y adhibe que "isto no ye prou pa sentir-me argüelloso d'o mio país. De feito, hue, os sentimientos que me fa estar espanyol son de vergüenya, impotencia y infinita indignación".
"Por tot ixo - remata -, no quiero que o mio nombre s'asocie, y muito menos sin o mio consentimiento, con ixe esperpento que han clamau "marca Espanya". Faigan a favor de clamar-me atra vegada quan haigan escoscau a casa, a chent pueda aspirar a un treballo digno, as institucions recobren a suya verdadera función y a etica torne a tener más valor que no os diners".

No creigo que ni ell, ni muitas atras personas que comparten istos sentimientos sigan independentistas d'os suyos respectivos países. Pero entienden perfectament lo que ye Espanya, y lo que significa culturalment. Quan Strawberry escribió "España es idiota" pa DEF CON DOS, no creigo que lo fese pensando en a secesión de garra territorio precisament.

As lenguas mereixen un tractamiento aparte en ista serie d'articlos que soi escribindo, y lo tendrán. Pero en un estau an que se charran siet luengas, an que un porcentache muit significativo d'a población en fa servir beluna ta expresar-se de cutio, ye raro que siga mas facil sentir en as radios estatals una canta en rumano u alemán que no en qualsiquier luenga de l'estau que no siga o castellano. Bueno, sería raro si no fuese por a construcción cultural y lingüistica d'a ideya (agora marca) "Espanya".

Manel se consiguió posicionar a primer colla en ventas de discos. Sino porque a SER los mete cada vegada que charra d'o "Procés", encara sería asperando a sentir-los en bella radio espanyola. Mallacán u Obrint Pas lo petoron en Chapón u Alemanya, pero ni una noteta en os telediarios. A "scena valenciana" ye agora mesmo fendo as propuestas más intresants d'a mosica en iste cabo d'Europa. Festivals espanyols como o Viñarock implen os suyos cartels con a mosica de Aspencat, Zoo, La Gossa Sorda, Auxili, ... pero tot ixo no apareixe en a radioformula.  ¿Ye porque o publico espanyol quiere entender punto por agulla as letras d'as cantas? Evidentement no, pues no sonaría garra canta en anglés. Dragostea din tei nunca no hese trunfau si hese estau por ixo. Ye porque Espanya ye una comunidat nacional lingüisticament analfabeta y incapable de superar una serie de fobias nacionals que fan que cantar en catalán, euskera u aragonés vede automaticament a qui lo fa, l'acceso a los medios de comunicación masivos. Mesmo si una persona tant espanyola quan intresa como Shakira, se l'ocurre fer una versión de "Boig per tu" de Sau, ha de soportar una campanya d'acoso y faltadas que fa vergüenya allena. Y no por a calidat d'a versión, sino por fer-la en catalán. De feito, dengún no criticó a Luz por cantar ixa mesma canta. Prou que no, porque lo fació en castellano.

Pa Espanya a cultura ye un estorbo. Un concieto d'afrancesadas. Lorca ye bien en a fuesa an que siga, y os actors son una clica de terroristas. L'arte y a cultura ye lo que paguen os turistas y, prou que sí, os toros. Toda la resta, masonería. Ye verdat que Millán Astray no dició literalment ixo de "Muera la intelichencia", pero a efectos practicos, ye lo mesmo.

Anteriorment, en #MarcaEspanya... (Se puet cambiar Espanya?)


jueves, 10 de noviembre de 2016

O trunfo d'o cunyadismo

Con o trunfo de Trump, cautiva y desarmada la socialdemocracia global, o cunyarcato aconsigue las suyas zaguers metas. Muitas se fan cruces, a demoscopia culle atro fracaso monumental, os periodistas se mueven entre o "yo ya lo dicié" y o "como puet estar?", ... pero ¿de verdat ye tant raro? No sabeba qui ganaría, ya que no tiengo los conoiximientos sobre os USA que me caldría. Ni una bola an que viyer o futuro, ni a formación politica u estadistica que fería falta. Pero nunca no pensé que a partida d'as esleccions la tenese ganada Hillary a priori. O cunyarcato ye más fuerte por cada día y me fería goyo de compartir bella reflexión, por si fese honra pa o debat.

Caractericemos, primero, a sociedat an que trunfa o cunyadismo. Somos cada vegada más receptivos a mensaches curtos y simples. A cantidat d'horas adedicadas a estar en o treballo, a desplazamientos absurdos, a fer ringlera en supermercaus, a l'ocio dirichiu, ... no nos deixan a posibilidat d'adedicar tiempo a pensar sobre as cosas. Pa afundar en qualsiquier tema, antimás, cal a sobén invertir prou tiempo. Alavez as unidatz comunicativas simplas y rapedas s'ixemenan muito mas eficientement que un discurso elaborau y con suco.

A sciencia politica ye de tot elitizada. Nomás un porcentache prou chicot d'a población tien prou formación pa entender detalles no tant fundos d'a politica cheneral. A mayoría, tienen conoiximientos basicos y radius de politica, no siguen l'actualidat, fueras d'os titulars d'os mass medias y, de feito, no les intresa guaire o tema.

Buena parte d'ixa politica, en haber-se simplificau os discuros, ha de tirar d'as partes más emocionals y simbolicas d'o publico que se i endreza. Os votants no queremos sentir "sesudos" analisis economicos, queremos que les den o suyo mereixiu a l'enemigo de turno, u que os nuestros simbolos sigan desfendius. Pa que nos devantemos d'o sofa, nos cal u bien que "nos toquen a fibra", u que nos presienten una menaza inminent que calga aturar a tot trance.

O miedo a o cambio ye una fuerza prou poderosa. Siempre en ye estada y agora ixo no ha cambiau mica. Isto funciona tanto a chiqueta escala, como l'alticamamiento que pueda provocar o cambio de ruta d'un autobús, como a gran escala, cada vegada que qüestionamos a estructura economica. O miedo s'alimenta de vez de todas as qüestions emocionals y simbolicas, lo que uniu a lo punto anterior, lo fa mesmo más eficaz.

Totz istos rasgos se reflexan en o modelo comunicativo d'os mass media. Una aparent libertat de prensa, que en realidat ye una libertat de interpresas comunicativas que repiten punto por agulla os mesmo mensaches basicament. Con bella diferencia, y contadas excepcions, pero en lo important iguals. Mensaches curtos y simplificadors d'a politica, que claman a las emocions y que fan tener miedo de qualsiquier cambio profundo. Os mass media son por un regular os millors aliaus d'os cunyadismo.

Os cunyaus no exichen cosa. A sola formación que les cal ye "a universidat d'a vida". Qui tien estudios se bambia de tener-ne, pero qui no tamién. No exichen discursos elaboraus, ni militancias, ni adedicar tiempo a cosa, u tener un pasau inmaculato. O cunyadismo abraza a los suyos, acullindo-les en a suya familia, más nombrosa por cada dia.

Contra ixe cunyadismo, i somos muitas que hemos trigau un camín de luita que ye lo opuesto a la eficiencia. Pa oposar-te a lo movimiento cunyau te cal conoixer toda la obra de Marx, haber estau militando en l'ecolochismo, l'antifaixismo, o feminismo, etc.. dende os 10 anyos, haber visitau bell país con conflicto, adedicar tot lo tuyo tiempo libre a asambleas, manifestacions y tallers, consumir productos eticos a pres insaumibles, ... No tenemos ni un segundo an que relaxar-nos, ubrir una biera, y viyer l'alienant televisión, u leyer un libro de ixautadas, porque ixo pareixe una traición a la revolución permanent.

Somos un rara avis, que mesmo contina fendo servir o latín en os suyos blogs. Y lo pior de tot, les tractamos con una superioridat moral de vomecar. Os cunyaus son chent como tu y como yo, y como qualsiquier atro. Pueden estar bien intelichents, controlar muitismo d'o suyo campo laboral, por eixemplo, u saber a-saber-lo de cine, u de comics, u d'o periodo Edo d'a historia chaponesa. Grans poetas y escritors son de vez grans cunyaus. Periodistas, filologos, ... conoixco cunyaus que son grans profesionals, u muit buena chent, pero que no por ixo deixan d'estar politicament cunyaus.

O cunyau no se caracteriza por estar un ignorant d'absolutament tot, sino por opinar con a mesma contundencia y aparent autoridat sobre qüestions que en sabe y sobre tot lo que no. Igual te opina sobre a interpresa que treballa como sobre lingüistica. A seguridat en si mesmo ye basica pa estar un cunyau.

Os suyos argumentos los despreciamos con un cenyo de superioridat u condescendencia. Con ixa riseta de "no sabes cosa, Chuan Nieu". A sobén, ni femos o poder de contraargumentar-les porque no queremos "rebaixar-nos a lo suyo libel". Cal estar conscients de que as nuestras verdatz no son evidents pa todas y totz. L'heteropatriarcau ye de muito pior explicar que "l'igualismo". Prebar de fer comprender en un ratico tot lo sistema d'opresión de l'hombre blanco heterosexual sobre a resta, ye muito más dificil que decir "totz iguals" y respuliar quatre topicos repetius dica l'ansia por os mass media. Ni con catorce, ni con deciueito, ni sisquiera con vintitantos entendeba exactament a extensión de l'heteropatriarcau, ni interpretaba o feminismo como lo foi agora. Igual con atros muitos temas. Me costó a saber que anyos de formación politica y de chent que, a lo mio arredol, perdió as suyas buenas horas de tiempo en explicar-me as suyas envistas.

A condescencencia y a superioridat no fan que enfortir-les en as suyas conviccions. Ells son "qui saben d'a vida" y nusatras unas hippies culturetas alternativas, con teorías "muit bien en a teoría, pero imposibles d'aplicar". Y "ya nos trobaremos con a realidat". O silencio, siga por ixo, u por prudencia social, pa no creyar una situación incomoda, lechitima a suya posición. Cal fer servir as mesmas ferramientas pa contestar-les. O cunyadismo no ye un movimiento politico, sino un luengache pa comunicar facilment politicas reaccionarias, conservadoras y/u neoliberals. Cal simplificar discursos, clamar a las emocions, o simbolismo y os sentimientos. Cal  meter en fren d'o miedo a lo cambio, l'asperanza d'un mundo millor pa todas.

Podemos, as mareas y as confluencias, fillas d'o 15M, tienen os alazetz de buena parte d'o suyo exito en cierta "cunyadización" d'o discurso de izquierdas. Totz os rasgos que he dito antes i son presents. Mesmo les contina costando asumir cosas como o feminismo u as diferents identidatz nacionals adintro d'o suyo discurso.

Ixa cunyadización no me molesta especialment, porque entiendo que cal. Pero hemos d'estar conscients de que a dreita fa servir o cunyadismo pa conseguir refirmes a unas politicas economicament y social prou agresivas. Si nusatras femos servir ixa mesma ferramienta pa fer socialdemocracia toba, hemos perdiu antes de prencipiar a chugar.

O cunyadismo ya ha trunfau. Ye por tot. Fer-nos-ne a mofla, nos ferá pasar buenos ratos, pero no solucionará cosa. Cal prencipiar a pensar en re-elaborar os discursos, adaptar-los a los tiempos y a lo publico que nos endrezamos y sacar-nos ixa napa de superioridat que tanto fastio fa. Ya va calendo que prencipiemos a ganar la batalla dialectica, tamién en a carrera.

martes, 8 de noviembre de 2016

Pilars 2016. Tierra de barrenaus 3x2,5 (especial D'estrela a estrela)

Bi ha calendatas que s'aguarda tot l'anyo en candeletas. Pilars, Esfendemos, o Salón d'o comic, .... Una d'as más especials pa yo ye D'estrela a estrela. En yera quan no teneba programa propio, asinas que guarda si en ye agora!

D'estrela a estrela ye una ferramienta de concienciación interna (pa qui femos parte de Radio Topo) y externa, con muita más trascendencia que no creyemos a sobén. Ya me ha tocau más d'una vez fer uellos de caparra en conoixer a chent que nos ascuita en puestos bien aluenyaus d'iste vico que a belunas nos pareixe que ye lo mundo entero. Pero tamién ye una chornada de convivencia de buena parte d'a comunidat aragonesofona de Zaragoza y d'as radios libres. 

Porque fatin fatian, o sabado nos fotiemos en a radio horas a brozuecos. Y entre programa y programa, pues bell refresco ya cayeba. Asinas que a fiesta d'a nueit, an que tenié a honor de compartir sesión con os grandismos Guindijey y Yosibear, se prolargó como caleba. Capazos, risas, brindis, morra, y muitas luitas en una chornada imposible d'ixuplidar.

Pa o programa mio, decidié de repetir tema, os Pilars, pero de dar-le una envista diferent. Si l'anyo pasau as más borineras recontemos as nuestras nueitz de borina, en ista edición he quiesto que charre chent que lo ha viviu de trazas bien diferents a las mias. U no tanto. Dos taxistas, dos hosteleras y un informador turistico que en treballar de fiestas, van que no aduben. A chent de Purna, que con o suyo treballo voluntario, nos dioron un sobrebuen puesto an que combinar un anyo más borina y luita, dos exiliaus que han viviu u viven os Pilars en a distancia, y un pai relativament recient que viye como l'ha cambiau a forma de disfrutar os Pilars. Ixos son os protagonistas d'iste programa con tanto convidau que mesmo habié de fer una escaleta y me torné un poquet más barrenau pa que tot salise meyo bien.

Puetz ascuitar-te-lo debaixo u descargar-te-lo, y viyer-te a #videofatera que gravé chusto antes de prencipiar a fer o programa.